कोंडी फोडण्यासाठी अमित शहा मैदानात, बोलावली शेतकरी संघटनांची तातडीची बैठक

कोंडी फोडण्यासाठी अमित शहा मैदानात, बोलावली शेतकरी संघटनांची तातडीची बैठक

अमित शहा यांच्या या बैठकीत 13 संघटनांचे प्रतिनिधी जाण्याची शक्यता व्यक्त केली जात आहे. शेतकऱ्यांचं आंदोलन हे देशव्यापी होत असल्याने सरकारची चिंता वाढली आहे.

  • Share this:

नवी दिल्ली 08 डिसेंबर:  शेतकरी संघटनांनी मंगळवारी भारत बंदची हाक दिली होती. या पार्श्वभूमीवर केंद्रीय गृहमंत्री अमित शहा यांनी शेतकरी नेत्यांना तातडीने चर्चेसाठी आमंत्रित केलं आहे. संध्याकाळी 7 वाजता हे नेते अमित शहा यांना भेटणार आहेत. त्यामुळे गेल्या 12 दिवसांपासून सुरू असलेल्या आंदोलनाची कोंडी फुटण्याची शक्यता व्यक्त केली जात आहे. शेतकरी नेते राकेश टिकैत (Rakesh Tikait) यांनी ही माहिती दिली. आता हे आंदोलन शेवटच्या टप्प्यात असून ही कोंडी लवकर फुटली पाहिजे अशी आशाही त्यांनी व्यक्त केली.

अमित शहा यांच्या या बैठकीत 13 संघटनांचे प्रतिनिधी जाण्याची शक्यता व्यक्त केली जात आहे. शेतकऱ्यांचं आंदोलन हे देशव्यापी होत असल्याने सरकारची चिंता वाढली आहे. त्यामुळे अमित शहा पुन्हा एकदा मैदानात उतरले असून ही कोंडी फोडण्यासाठी नवी रणनीती आखली जात आहे.

शेतकऱ्यांच्या आंदोलनादरम्यान (Farmer Movement) आणखी एका शेतकऱ्याचा ह्रदयविकाराने मृत्यू (Farmer Death) झाला आहे. हा शेतकरी टिकरी बॉर्डरवर (Tikri Border) वर प्रदर्शनात सहभागी झाला होता. सोमवारी त्याची प्रकृती अचानक बिघडली होती. त्यानंतर त्यांना बहादुरगढ इथल्या एका हॉस्पिटलमध्ये भरती करण्यात आलं होतं. त्यांना ह्रदयविकाराचा झटका आल्याचं डॉक्टरांनी सांगितलं. उपचार सुरू असतानाच मंगळवारी त्यांचा मृत्यू झाला. गेल्या 12 दिवसांपासून सुरू असलेल्या या आंदोलनात विविध कारणांमुळे 12 शेतकऱ्यांचा मृत्यू झाला आहे.

मोदी सरकारने जाहीर केला कोरोना लसीकरणाचा प्लॅन; कुणाला मिळणार पहिली लस?

कडाक्याची थंडी, दुपारचं उन आणि खाण्यापिण्याची आबाळ यामुळे वयोवृद्ध शेतकऱ्यांना त्रास होतोय. त्यातूनच काहींची प्रकृती बिघडली तर काही अपघातामुळे मृत्यूमुखी पडले. मंगळवारी भारत बंदचं आयोजन शेतकऱ्यांनी केलं होतं. त्यामुळे आंदोलन स्थळी जास्त गर्दी झाली आहे.

केंद्र सरकारने मंजूर केलेली नवी कृषी विधेयकं परत घेण्यात यावीत यासाठी शेतकऱ्यांनी आंदोलन पुकारलं आहे. सरकार आणि शेतकऱ्यांच्या प्रतिनिधींमध्ये चर्चेच्या अनेक फेऱ्या झाल्या असून त्यात तोडगा निघालेला नाही. 9 डिसेंबर रोजी शेतकरी आणि केंद्र सरकार यांच्यात सहाव्यांदा चर्चा होणार आहे. यापूर्वी पाच वेळा झालेल्या चर्चेतून कोणताही निष्कर्ष आलेला नाही. त्यामुळे आता उद्या 9 डिसेंबर रोजी शेतकरी आणि केंद्र सरकारमध्ये नेमकी काय चर्चा होणार हे पाहणं महत्त्वाचं ठरणार आहे.

Published by: Ajay Kautikwar
First published: December 8, 2020, 4:58 PM IST
Tags: Amit Shah

ताज्या बातम्या