Jammu Kashmir: दहशतवाद्यांविरोधात सर्च ऑपरेशन दरम्यान भारतीय जावानाला वीरमरण, कृष्ण वैद्य शहीद

जम्मू काश्मीर, 24 जुलै : दहशतवाद्यांच्या विरोधात सुरू असलेल्या मोहिमे दरम्यान भारतीय सैन्यदलातील जवान कृष्ण वैद्य यांना वीरमरण आले आहे. शुक्रवारी जम्मू काश्मीरमधील कृष्णा घाटी सेक्टर (Krishna Ghati Sector, Jammu Kashmir) मध्ये सुरू असलेल्या ऑपरेशन दरम्यान जवान कृष्ण वैद्य यांना वीरमरण (Sepoy Krishna Vaidya lost life) आले आहे. न्यूज एजन्सी एएनआयने या संदर्भात ट्विट केलं आहे.

गेल्या दोन दिवसांपासून जम्मू-काश्मीरमधील कृष्णा घाटी सेक्टर, बालाकोट सेक्टर आणि मनकोट सेक्टर परिसरात दहशतवाद्यांच्या विरोधात भारतीय सैन्य दलाकडून मोठ्या प्रमाणात सर्च ऑपरेशन सुरू आहे. 23 जुलै रोजी भारतीय सैन्य दलाची एक तुकडी सर्च ऑपरेशन करत असताना कृष्ण वैद्य हे शहीद झाले आहेत.

Sepoy Krishna Vaidya lost his life during operations on 23rd July 2021 at Krishna Ghati Sector, Jammu and Kashmir: 16 Corps, Indian Army pic.twitter.com/39cVvUIQJ1

— ANI (@ANI) July 24, 2021

जम्मू-काश्मीरमध्ये शनिवारी सकाळीच भारतीय सैन्य दल आणि दहशतवाद्यांमध्ये चकमक सुरू झाली आहे. दोन्ही बाजूंनी गोळीबार सुरू आहे. पोलीस आणि सैन्य दलाच्या संयुक्त टीमकडून दहशतवाद्यांच्या विरोधात कारवाई सुरू आहे.

शुक्रवारी सुरक्षा दलाने ड्रोन पाडला 

शुक्रवारी जम्मू-काश्मीर पोलिसांनी जम्मू जिल्ह्याच्या सीमावर्ती भागात पाच किलोग्रॅम स्फोटक सामग्री (आयईडी) घेऊन जाणारं एक ड्रोन पाडलं. यासोबतच दहशतवाद्यांचा हल्ल्याचा डाव हाणून पाडला आहे. पोलिसांनी सांगितले की, गुरुवारी रात्रीच्या सुमारास आंतरराष्ट्रीय सीमेवर कानाचक येथे एक ड्रोन दिसून आला त्यानंतर सुरक्षा दलाने हा संशयास्पद ड्रोन पाडला.