भाजपच्या आणखी एक ज्येष्ठ निवडणुकीपासून दूर; इंदूरच्या ताईंनी अखेर स्वतःच पत्र लिहिलं आणि....

भाजपच्या आणखी एक ज्येष्ठ निवडणुकीपासून दूर; इंदूरच्या ताईंनी अखेर स्वतःच पत्र लिहिलं आणि....

लालकृष्ण अडवाणी आणि मुरली मनोहर जोशी यांच्यानंतर मावळत्या लोकसभेच्या सभापती सुमित्रा महाजन यासुद्धा लोकसभा निवडणुकीपासून दूर राहणार हे स्पष्ट झालं आहे. स्वतः सुमित्रा महाजन यांनीच अद्याप इंदूरमधून उमेदवार जाहीर का झालेला नाही, असं विचारून एक पत्र लिहिलं आहे.

  • Share this:

इंदूर, 5 एप्रिल : लालकृष्ण अडवाणी आणि मुरली मनोहर जोशी यांच्यानंतर मावळत्या लोकसभेच्या सभापती सुमित्रा महाजन यांनाही भाजप उमेदवारी देणार नाही आणि त्यांचीही राजकीय कारकीर्द संपुष्टात येणार, अशी चर्चा गेले अनेक दिवस सुरू होती. या निवडणुकीत वयोवृद्ध नेत्यांना उमेदवारी न देण्याचं भाजपचं धोरण असल्याने इंदूरच्या खासदार सुमित्रा महाजनांना पुन्हा संधी देणार नाही, अशी सूत्रांची माहिती होती. तरीही अद्याप इंदूरच्या जागेसाठी भाजपने उमेदवार जाहीर न केल्याने संभ्रम कायम होता. आता सुमित्रा महाजन यांनी स्वतःच पत्र लिहून आपण निवडणूक लढणार नसल्याचं स्पष्ट केलं आहे.

काय म्हटलंय पत्रात?

'अद्याप पक्षाने इंदूरमधून उमेदवार जाहीर का केला नाही?' असा प्रश्न विचारतच त्यांनी या पत्राची सुरुवात केली आहे. 'यासंदर्भात पक्षात काही अनिश्चितता किंवा असामंजस्य असेल तर ते दूर व्हायला हवं, म्हणून मी घोषणा करीत आहे', असं महाजन यांनी म्हटलं आहे. 'इंदूरच्या लोकांनी मला खूप प्रेम दिलं. भाजपच्या सहकाऱ्यांनी नेहमीच मदत केली, सहकार्य केलं. त्यांची मी आभारी आहे, असं सांगून त्यांनी लवकरात लवकर इंदूरमधून उमेदवार जाहीर करावा. म्हणजे  कार्यकर्त्यांना आणि नेत्यांना काम करण्याची दिशा मिळेल.'

सुमित्रा महाजन यांचं वय ७६ वर्षं आहे. लालकृष्ण अडवाणी आणि मुरली मनोहर जोशी यांच्यानंतर महाजन यांचीही राजकीय कारकीर्द संपुष्टात येणार, अशी शक्यता वर्तवण्यात येत होतीच. पण महाजन स्वतः याविषयी काही बोलत नव्हत्या. सुमित्रा महाजन यांच्या इंदूरच्या घरी नेहमीच कार्यकर्त्यांची वर्दळ असते. पण त्यांच्या उमेदवारीची शक्यता दिसत नसल्याने ही कार्यकर्त्यांची वर्दळही कमी झाली आहे. इंदूरच्या ताई अशी सुमित्रा महाजन यांची ओळख. पण ताईही वातावरणाचा अंदाज घेत असाव्यात. त्यामुळे त्यांनी या विषयावर इतके दिवस मौन बाळगणंच पसंत केलं होतं.

1989 पासून अजिंक्य होत्या ताई

इंदूरचा मतदारसंघ सुमित्रा महाजन यांच्या नावानेच ओळखला जायचा. 1989 पासून केवळ सुमित्रा महाजन या जागेवरून सलगपणे निवडून येत आहेत. खरं तर काही महिन्यांपूर्वी 'माझ्याविरुद्ध कुणालाही रिंगणात उतरवून दाखवाच', असं आव्हानही सुमित्रा महाजन यांनी काँग्रेसला सुरुवातीला दिलं होतं. इंदूरच्या मतदारसंघातूनच निवडणूक लढवण्याची त्यांची इच्छा होती. पण आता त्यांच्या उमेदवारीवर निर्णय न झाल्याने त्यांचे समर्थक नाराज आहेत.

गेल्या महिन्यात न्यूज 18 ने जेव्हा त्यांच्याशी याबाबत संपर्क साधला होता. तेव्हा उमेदवारीच्या विषयावर कोणतीही प्रतिक्रिया द्यायला त्यांनी नकार दिला होता. भाजपने त्यांच्याऐवजी उमेदवाराचा शोधही सुरू केला आहे. लोकसभेच्या उमेदवारीसाठी इंदूरच्या महापौर मालिनी गौड आणि कैलाश विजयवर्गीय यांच्या नावांचा विचार होतोय, अशी सूत्रांची माहिती आहे.

सुमित्रा महाजन यांच्या उमेदवारीवरून काँग्रेसनेही भाजपला लक्ष्य केलं आहे. पक्षात ज्येष्ठ नेत्यांचा सन्मान होत नाही, अशी टीका काँग्रेसने केली आहे. सुमित्रा महाजन यांच्या वयाच्या कारणासोबतच त्यांची निष्क्रियता हेही त्यांना उमेदवारी न देण्याचं कारण आहे, असं काँग्रेस नेत्यांनी म्हटलं आहे.

मला राज ठाकरेंच्या अवस्थेबद्दल दुर्दैव वाटतं- मुख्यमंत्री

First published: April 5, 2019, 2:49 PM IST

ताज्या बातम्या