57 तासांच्या कर्फ्यूआधी गोंधळ, दुकानांबाहेर लोकांच्या लांबच लांब रांगा; तुफान गर्दीचा VIDEO आला समोर

अहमदाबाद, 20 नोव्हेंबर : गुजरातच्या अहमदाबाद (Covid-19 Ahmedabad) शहरात कोरोनाबाधितांची संख्या वाढली आहे. यामुळे आता प्रशासनानं आजपासून 57 तासांचा कर्फ्यू लावण्याचा निर्णय घेण्यात आला आहे. रात्री 9 पासून ते सकाळी 6 वाजेपर्यंत हा कर्फ्यू असणार आहे. दुसरीकडे कोरोना रुग्णांची वाढती संख्या लक्षात घेता, सरकारने 23 नोव्हेंबरपासून राज्यात माध्यमिक शाळा आणि महाविद्यालये सुरू करण्याचा निर्णय थांबविला आहे.

अतिरिक्त मुख्य सचिव राजीव कुमार गुप्ता म्हणाले की, या 'कर्फ्यू' दरम्यान फक्त दूध व औषधांची दुकाने खुली राहतील. त्यामुळे सकाळपासून रस्त्यावर मोठ्या प्रमाणात गर्दी पाहायला मिळाली. दुकानं बंद ठेवण्यात येणार असल्यामुळे लोकांनी दुकानांबाहेर लांबच लांब रांगा लावल्या. यावेळी सोशल डिस्टन्सिंगचे नियम लोकांनी पाळले होते, मात्र गर्दीमुळे काहीशी चिंता वाढली होती.

वाचा-पुणेकरांनो काळजी घ्या! 22 दिवसांत असं बदललं चित्र, महापौरांनी केलं आवाहन

अहमदाबाद : आज रात्री 9 पासून ते सकाळी 6 वाजेपर्यंत शहरात कर्फ्यू लागू केला जाणार आहे. याआधी दुकानाबाहेर लोकांची तोबा गर्दी. pic.twitter.com/KD4rRku8cH

— News18Lokmat (@News18lokmat) November 20, 2020

वाचा-सर्वांपर्यंत कोरोना लस पोहोचवायची असेल तर हे करा - उद्योजिकेचा अभिनव उपाय

अहमदाबादमध्ये कोरोनाचे रुग्ण पुन्हा एकदा वाढत असल्याचं लक्षात आल्यावर रात्रीचा कर्फ्यू लागू करण्याचा निर्णय घेण्यात आला. अहमदाबादमध्ये कोरोनाचा(Covid-19) मुकाबला करण्यासाठी 300 डॉक्टर्स आणि मेडिकलच्या 300 विद्यार्थ्यांना सज्ज राहण्यास सांगण्यात आलं आहे. त्याच बरोबर 20 रुग्णवाहिका तयार ठेवण्यात आल्या आहेत. शहरातल्या सरकारी आणि खासगी हॉस्पिटल्समधले बेड्स वाढविण्यात आले आहेत. शहरात सध्या 2600 बेड्स खाली आहेत. लोकांनी नियमांचं सक्तीने पालन करावं असं आवाहन प्रशासनाने केलं आहे. पुढच्या आदेशापर्यंत हा कर्फ्यू कायम राहणार असल्याचंही प्रशासनाने म्हटलं आहे. अहमदाबाद हे शहर कोरोनाचं हॉटस्पॉट झालं होतं. दिवाळीची गर्दी ओसरल्यानंतर आता रुग्णांची संख्या वाढण्याची भीती व्यक्त केली जात आहे.

वाचा-तुमच्यापर्यंत कधी पोहोचणार Corona Vaccine? लशीचा गुण कितपत? लशीबद्दल सर्व काही..

महाराष्ट्रातही लागू होणार का पुन्हा Lockdown?

महाराष्ट्रातही दिवाळीनंतर कोरोनाचे रुग्ण वाढू लागले आहेत. त्यामुळे पुन्हा एका लॉकडाऊनच्या चर्चा सुरू झाल्या आहेत. महाराष्ट्र सरकारने पुन्हा लॉकडाऊन लावण्यासंदर्भातली कुठलीही घोषणा केलेली नाही किंवा तसे संकेतही दिलेले नाहीत. उलट महाराष्ट्रात 23 नोव्हेंबरपासून शाळा सुरू होणार आहेत. पण दिवाळीपूर्वीच्या गर्दीमुळे शहरात वाढलेला कोरोनाचा धोका कसा हाताळायचा याबाबत काही माहिती सरकारने दिलेली नाही.