तेव्हा लालू आता 'लाल'ची कमाल; 7 वर्षात दुसऱ्यांदा JDU-RJD एकत्र, अशी आहे Inside Story

पाटणा, 9 ऑगस्ट : राजकारणात कोणी कोणाचा कायमचा शत्रू किंवा मित्र नसतो असं म्हणतात. याचाच प्रत्यय बिहारमध्ये आला आहे. बिहारमध्ये पुन्हा एकदा राजकीय उलथापालथ झाली असून 20 वर्षांहून अधिक काळ प्रतिस्पर्धी असलेले नितीश कुमार यांचा जेडीयू आणि लालूप्रसाद यादव यांचा आरजेडी सात वर्षांत दुसऱ्यांदा एकत्र सरकार चालवणार आहेत. राजकीय चढाओढीत जेडीयू आणि भाजपची युती तुटली असून आता नितीश कुमार तेजस्वी यादव यांच्या नेतृत्वाखाली आरजेडीसोबत सरकार स्थापन करण्याच्या तयारीत आहेत. सूत्रांच्या माहितीनुसार नितीश कुमार आणि तेजस्वी यादव यांच्या युतीवर शिक्कामोर्तब झाले असून महाआघाडीच्या सरकार स्थापनेची ब्लू प्रिंटही तयार झाली आहे. महाआघाडीच्या सरकारमध्ये नितीश कुमार मुख्यमंत्री राहतील आणि तेजस्वी यादव उपमुख्यमंत्री असतील.

दोन्ही वेळा अचूक टायमिंग

RJD आणि JDU मधील युती अशा वेळी झाली आहे जेव्हा RJD सुप्रीमो लालू प्रसाद यादव चारा घोटाळा प्रकरणात जामिनावर तुरुंगातून बाहेर आहेत आणि दिल्ली एम्समध्ये उपचार घेत आहेत. यापूर्वी 2015 मध्ये जेव्हा आरजेडी आणि जेडीयूची युती झाली होती, तेव्हाही लालू प्रसाद यादव जामिनावर तुरुंगाबाहेर होते. जेडीयू आणि आरजेडीने एकत्र येऊन दोनदा सरकार स्थापन केले आणि लालू प्रसाद यादव दोन्ही वेळा तुरुंगाबाहेर होते, हे केवळ योगायोगच म्हणावे लागेल. 2015 मध्ये, महाआघाडीचे सरकार स्थापन करण्याचे संपूर्ण श्रेय लालू प्रसाद यादव यांना जाते. कारण नितीश कुमार यांच्याशी युती करण्याचा निर्णय पूर्णपणे लालू प्रसाद यादव यांचा होता. लालू यादव यांच्यामुळेच आरजेडीच्या जागा वाढल्या होत्या.

पारस रुग्णालयात लिहली गेली स्क्रिप्ट

2015 मध्ये जेव्हा RJD आणि JDU यांच्यात युती झाली तेव्हा त्यासाठी आयोजित पत्रकार परिषदेत नितीश आणि लालू प्रसाद यादव एकत्र दिसले होते. त्यावेळी देखील लालू प्रसाद यादव हेच युतीचे एकमेव माध्यम बनले. कारण, लोकसभा निवडणुकीनंतर लगेचच राज्यसभा निवडणुकीत पाठिंबा मागण्यासाठी नितीश कुमार लालू प्रसाद यांना भेटायला गेले होते आणि त्या बैठकीत युतीची स्क्रिप्ट लिहिली गेली होती. यावेळीही आरजेडी आणि जेडीयू पुन्हा एकत्र आले असताना त्याची स्क्रिप्टही लालूंच्या उपस्थितीत लिहिली गेली. सूत्रांनी दिलेल्या माहितीनुसार, लालू प्रसाद यादव यांना यापूर्वी पाटण्यातील पारस रुग्णालयात दाखल करण्यात आले होते, तेव्हा नितीश कुमार यांनी स्वत:हून त्यांची प्रकृती जाणून घेतली होती. त्यावेळी लालू यादव यांना सरकारी खर्चाने उपचारासाठी दिल्लीला पाठवले जाईल, असे सांगितले होते. राजकीय जाणकारांच्या मते, युतीच्या स्क्रिप्टचे पहिले पान येथे लिहिले गेले.

महाराष्ट्रात मंत्रिमंडळ विस्तार होत असताना बिहारमध्ये भाजपला मोठा झटका! नितीश कुमारांचा धक्का

तेजस्वी यांची कमाल

दरम्यान, राजकीय जाणकारांचे म्हणणे आहे की, 2015 मध्ये लालूंचा चमत्कार दिसला होता, तर यावेळी लालूंपेक्षा त्यांचे धाकटे लाल म्हणजेच तेजस्वी यांची कमाल दिसली. यावेळी तेजस्वी यादव युतीबाबत फ्रंटफूटवर खेळताना दिसले. मात्र, यामध्ये लालू प्रसाद यादव यांचीही भूमिका महत्त्वाची आहे. कारण तेजस्वी यादव हे वेळोवेळी वडील लालू प्रसाद यादव यांना केवळ अपडेट्स देत नव्हते, तर नवीन समीकरणाबाबत त्यांच्याकडून सल्लाही घेत होते. तेजस्वी यादव यांचा अघोषित राज्याभिषेक राजदमध्ये झाला आहे, हे येथे नमूद करणे आवश्यक आहे. नुकत्याच झालेल्या विधिमंडळ पक्षाच्या बैठकीत हा निर्णय घेण्यात आला. इतकेच नाही तर तेजस्वी यादव यांना लवकरच आरजेडी सुप्रिमोची कमान मिळू शकते. कारण लालू यादव यांची तब्येत खूपच खराब आहे आणि आता ते पूर्वीसारखे धोरणात्मक निर्णयही घेत नाहीत.

2015 मध्ये जागांची संख्या किती होती

2015 च्या विधानसभा निवडणुकीत भाजप आणि जेडीयू वेगळे झाले होते आणि 20 वर्षांनंतर लालू आणि नितीश हे दोन कट्टर प्रतिस्पर्धी एकत्र आले होते. या निवडणुकीत आरजेडी-जेडीयू महाआघाडीने 178 जागा जिंकल्या होत्या, तर भाजपच्या नेतृत्वाखालील एनडीएला 58 जागा मिळाल्या होत्या. आरजेडीला 80, जेडीयूला 71, काँग्रेसला 27 आणि भाजपला 53 जागा मिळाल्या होत्या. मात्र, 17 महिन्यांनंतर महाआघाडीत तेढ निर्माण झाली आणि नितीशकुमार यांनी पुन्हा भाजपसोबत सरकार स्थापन केले.

आता जागांचे गणित काय

बिहारमध्ये आरजेडी आघाडीचे सध्या 114 आमदार आहेत. सध्या आरजेडीच्या जागांची संख्या 79 आहे आणि नितीश कुमार यांच्या जेडीयूकडे 45 आमदार आहेत. काँग्रेस आमदारांचे संख्याबळ 19 आहे. त्याचबरोबर भारतीय जनता पक्षाचे 77 आमदार आहेत. सीपीआय (एमएल)-12, सीपीएम-2, सीपीआय-2 आणि जीतन राम मांझी यांच्या हमकडे 4 आमदार आहेत.