म्हैसूर, 16 मे : कोरोनाचा देशभरात कहर (Coronavirus) सुरू असून अनेकांनी या काळात आपल्या जवळच्या लोकांना गमावलं आहे. अनेक चिमुकल्यांनी आपल्या आई-वडिलांचं छत्र गमावलं आहे. अशीच अतिशय हृदयद्रावक घटना कर्नाटकातील म्हैसूरमधून समोर आली आहे. डोड्डेनहल्ली गावातील एका महिलेने लग्नानंतर नऊ वर्षांनी एका चिमुकलीला 11 मे रोजी जन्म दिला, पण त्या चिमुकलीच्या जन्माआधी आणि जन्मानंतरही मोठं संकट कोसळलं.
ममता आणि नंजुंडे गौडा यांच्या घरी नऊ वर्षांची गोड बातमी समजल्याने हे जोडपं मोठं आनंदात होतं. या आनंदाच्या काळात कोरोनाचं संकट येऊ नये, म्हणून योग्य ती काळजी घेण्यात येत होती. पण कोरोनाने या कुटुंबाला गाठलंच आणि बाळाच्या जन्माआधीच मोठं संकट कोसळलं. 45 वर्षीय नंजुंडे गौडा यांचा बाळाच्या जन्माआधीच 30 एप्रिलला मृत्यू झाला. बंगळुरूमध्ये उपचारादरम्यान त्यांचा मृत्यू झाला.
त्यानंतर 11 मे रोजी बाळाचा जन्म झाला आणि केवळ चार दिवसांत बाळाच्या आईचा, ममता यांचा मृत्यू झाला. ममता यांनाही कोरोनाची लागण झाली होती. त्याचदरम्यान त्यांनी बाळाला जन्मही दिला. काही दिवसांत त्यांची तब्येत खालावली आणि 15 मे रोजी कोरोनाने त्यांनाही हिरावलं.
नऊ वर्षांपूर्वी नंजुंडे आणि ममता यांचं लग्न झालं होतं. मात्र त्यांनं बाळ झालं नव्हतं. आता नऊ वर्षांनी घरात आनंदांची बातमी आली होती. मात्र काळाने त्यांचा सगळाच आनंद हिरावून घेतला. आता ममता यांच्या भावंडांनी त्या चिमुकलीचा सांभाळ करण्याचा निर्णय घेतला आहे.
मराठी बातम्या, ब्रेकिंग न्यूज मराठीत सर्वात आधी News18 लोकमतवर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.