राष्ट्रपतींनीच टिपू सुलतानचा गौरवार्थ उल्लेख केला होता हे विसरला का? काँग्रेस नेत्याने भाजपला फटकारले

मुंबई, 26 जानेवारी : मुंबई महापालिका निवडणुकीच्या तोंडावर (mumbai corporation election) मालाडमधील मैदानाला टीपू सुलतानचे (tipu sultan ground malad west) नाव दिल्यामुळे भाजपने जोरदार आंदोलन पुकारले आहे. तर राष्ट्रपती रामनाथ कोविंद यांनी टिपू सुलतानचा गौरवार्थ उल्लेख केला हे भाजपा विसरला का? असा सणसणीत सवाल महाराष्ट्र प्रदेश काँग्रेस कमिटीचे सरचिटणीस सचिन सावंत (sachin sawant) यांनी केला आहे. तसंच, 'महापुरुषांची धर्माच्या आधारावर विभागणी करुन द्वेष पसरवणे भाजपाची विकृत पद्धती आहे. टिपू सुलतानने मदत केलेल्या १५६ मंदिरांची यादी भाजपाने पहावी, असा टोलाही सावंत यांनी लगावला. मालाड येथील क्रीडा संकुलाचं टिपू सुलतान असं नामकरण करण्यात आलं आहे. काँग्रेस नेते आणि मुंबईचे पालकमंत्री अस्लम शेख टिपू सुलतान यांच्या नावासाठी आग्रही होते. पण त्याआधीच मैदानाच्या बाहेर प्रचंड गदारोळ बघायला मिळाला. भाजपने जोरदार आंदोलन केले आहे. एवढंच नाहीतर पोलीस स्टेशनसमोरच ठिय्या मांडला होता. पण, आता काँग्रेसचे नेते सचिन सावंत यांनी भाजपला जोरदार उत्तर दिले आहे.

.@BJP4Maharashtra च्या नेत्यांच्या प्रबोधनासाठी राष्ट्रपती रामनाथ कोविंद यांनी शहीद टिपू सुलतान यांचा केलेला गौरवार्थ उल्लेख. नेताजी सुभाषचंद्र बोस यांचा नाही जरी केला तरी राष्ट्रपतींचा तरी भाजपा नेते आदर करतील अशी अपेक्षा आहे. pic.twitter.com/vKOV1yhoSi

— Sachin Sawant सचिन सावंत (@sachin_inc) January 26, 2022

'ऐतिहासिक व्यक्तिमत्वांची धर्माच्या आधारावर विभागणी करुन द्वेष पसरवणे व ध्रुवीकरणाचे राजकारण करणे ही भाजपाची विकृत पद्धती आहे. २०१७ ला कर्नाटक विधानसभेत राष्ट्रपती रामनाथ कोविंद यांनी टिपूचा गौरवार्थ उल्लेख केला हे भाजप विसरला का? असा संतप्त सवाल  सचिन सावंत यांनी केला आहे. 'इतिहासाला काळा गोरा रंगवून टिपू सुलतानच्या नावाला भाजपा विरोध करत आहे. परंतु कोल्लूर येथील श्री मुकांबिका मंदिरातील पुजारी टिपूच्या सन्मानार्थ दररोज संध्याकाळी 7:30 वाजता "सलाम मंगलारती" करतात. नंजनगुड येथील श्रीकंठेश्वर मंदिरात, टिपूने सादर केलेल्या पन्नाच्या लिंगाची पूजा सुरू आहे. नेताजी बोस यांच्या होलोग्रामचे उद्घाटन पंतप्रधान मोदींनी केले त्याच नेताजींनी टिपू सुलतानाचा शहीद म्हणून उल्लेख करून टिपूच्या म्हैसूर टायगरचा समावेश आझाद हिंद सेनेच्या झेंडा तथा गणवेशावर केला होता' असा दाखलाच सावंत यांनी दिला. तसंच, 'पेशव्यांच्या सेनेने इंग्रजांशी मिळून श्रींगेरी मठ उद्ध्वस्त केला तेव्हा देवस्थानाचे रक्षण व पुनर्स्थापना टिपू सुलतानने केली होती. म्हैसूर गॅझेटमध्ये टिपू सुलतानने मदत केलेल्या १५६ मंदिरांची यादी दिली आहे याची आठवणच सावंत यांनी करून दिली. 'भारत माझा देश आहे आणि सारे भारतीय माझे बांधव आहेत' ही प्रतिज्ञा घेतलेल्या व विविधतेचे निदर्शक तिरंग्यातील तीन रंगांवर प्रेम करणाऱ्या प्रत्येकाने भाजप व संघाच्या विकृत विचारधारेचा निकराने विरोध केला पाहिजे', असंही सावंत यांनी ठणकावून सांगितलं.