खडसेंबरोबर मुंबई भाजपचा मोठा नेताही पक्ष सोडणार का? प्रकाश मेहतांनीच दिलं उत्तर- पाहा VIDEO

मुंबई, 21 ऑक्टोबर : ज्येष्ठ नेते एकनाथ खडसे यांनी अखेर भारतीय जनता पक्षाच्या सदस्यत्वाचा राजीनामा (Eknath Khadse resigns BJP) दिला. ते शुक्रवारी राष्ट्रवादी काँग्रेसमध्ये अधिकृतपणे प्रवेश करण्याची शक्यता आहे. माजी मुख्यमंत्री देवेंद्र फडणवीस यांच्यावर आपण नाराज आहोत. म्हणून पक्ष सोडत असल्याचं त्यांनी जाहीरपणे सांगितलं. अशीच नाराजी मुंबई भाजपतले (Mumbai BJP) बडे नेते आणि माजी आमदार प्रकाश मेहता (Prakash mehta) यांनी काही काळापूर्वी व्यक्त केली होती.

खडसेंबरोबर तुम्हीसुद्धा भाजपला रामराम करणार का, असं विचारलं असता प्रकाश मेहता यांनी मात्र आपण तसं करणार नसल्याचं News18Lokmat शी बोलताना सांगितलं. "मी पक्ष सोडून अजिबात जाणार नाही. उलट मी खडसे साहेबांनीसुद्धा पक्षाबरोबरच राहावं, असं आवाहन करेन. खडसे साहेब पक्षाला जन्म देण्याऱ्यांपैकी एक आहेत. त्यांचा पक्षाच्या वाढीत मोठा वाटा आहे. त्याप्रमाणे पक्षात त्यांना सन्मानही मिळतो आहे. माझं त्यांना आवाहन आहे की त्यांनी पक्ष सोडण्याच्या निर्णयाचा पुनर्विचार करावा."

खडसेंबरोबर मुंबई भाजपचा मोठा नेताही पक्ष सोडणार का? प्रकाश मेहतांनीच दिलं उत्तर- पाहा - #BJP@EknathGKhadse @BJP4Maharashtra pic.twitter.com/mVTBZHmLjx

— News18Lokmat (@News18lokmat) October 21, 2020

विधानसभेचं तिकिट पक्षाने नाकारलं तेव्हा प्रकाश मेहता नाराज असल्याची चर्चा होती. खडसे यांच्याप्रमाणेच डावललेल्या नेत्यांमध्ये मेहतांचं नाव घेतलं जात होतं. फडणवीसांविरोधातली नाराजी खडसे यांच्याप्रमाणेच प्रकाश मेहता यांनीही जाहीरपणे व्यक्त केली होती. त्यामुळे तेही पक्ष सोडून जाणार का, या चर्चेला उधाण आलं होतं. या चर्चांना पूर्णविराम देत आपण पक्षासोबतच राहणार असल्याचं मेहता यांनी स्पष्ट केलं.  "वर्ष झालं निवडणुकीला.  उमेदवारी न मिळणं म्हणजे नाराज आहोत  असं नाही. पक्षनेते आणि मी एकमेकांच्या संपर्कात आहोत. मी पक्षाचं काम करत राहणार. मी पक्ष सोडणार ही अजिबात चुकीची बातमी आहे", असं प्रकाश मेहता यांनी स्पष्ट केलं.