एकनाथ खडसे भाजप सोडणार का? पंकजा मुंडे यांनी पहिल्यांदाच व्यक्त केली प्रतिक्रिया VIDEO

मुंबई 16 ऑक्टोबर: गेल्या काही वर्षांपासून नाराज असलेले भाजपचे ज्येष्ठ नेते एकनाथ खडसे हे पक्ष सोडण्याच्या तयारीत असल्याची सध्या जोरदार चर्चा आहे. खडसे हे राष्ट्रवादीत जाणार असल्याचं निश्चित झालं असून येत्या काही दिवसांमध्ये ते प्रवेश करतील असंही खडसे यांच्या जवळच्या लोकांकडून सांगितलं जात आहे. या पार्श्वभूमीवर भाजपच्या नेत्या पंकजा मुंडे यांनी पहिल्यांदाच खडसे यांच्या भाजप सोडण्याच्या वृत्तावर ‘न्यूज18 लोकमत’शी बोलताना आपली प्रतिक्रिया दिली आहे. विधानसभेतल्या पराभवानंतर पंकजा मुंडे याही नाराज होत्या. त्यांनी ती नाराजी अनेकदा जाहीरपणे बोलूनही दाखवली होती. खडसे आणि पंकजा मुंडे यांनी एकत्रितपणेही काही जाहीर कार्यक्रमांमधून आपल्या मनातली खदखदही बोलून दाखवली होती. पंकजा मुंडे यांची नुकतीच भाजपच्या राष्ट्रीय सचिव म्हणून नियुक्ती करण्यात आली होती. त्यामुळे त्यांची नाराजी दूर करण्याचा प्रयत्न भाजपने केला असल्याचं म्हटलं जातं. त्यामुळे पंकजा मुंडे काय भूमिका मांडतात याकडे सगळ्यांचं लक्ष लागलं होतं. ‘न्यूज18 लोकमत’शी खास बातचित करताना त्या म्हणाल्या, एकनाथ खडसे हे भाजप सोडून जाणार नाहीत याची मला खात्री आहे. खडसे हे अनुभवी आणि पक्षाचे ज्येष्ठ नेते आहेत असंही त्यांनी सांगितलं.

पंकजा मुंडे Exclusive एकनाथ खडसे भाजप सोडणार का? मराठा आरक्षणाच्या वादावर काय आहे भूमिका? आणखी बरच काही... pic.twitter.com/OacFyxfxUI

— News18Lokmat (@News18lokmat) October 16, 2020

राज्यात पडलेल्या पावसामुळे शेतकऱ्यांसाठी  राज्य सरकारने संवेदनशीलपणे निर्णय घेऊन मदत करायला हवी अशी अपेक्षा त्यांनी व्यक्त केली. मराठा समाजाला आरक्षण मिळालं पाहिजे पण ओबीसी आरक्षणाला धक्का नको असंही त्यांनी स्पष्ट केलं. ऊसतोड कामगारांच्या हक्कांसाठी पुन्हा एकदा मैदानात उतरणार असल्याही घोषणाही पंकजा मुंडे यांनी केली आहे. फडणवीस काय म्हणाले? 'एकनाथ खडसे हे आमचे ज्येष्ठ नेते आहेत. आमच्या सर्वांची इच्छा आहे, त्यांनी आमच्यासोबत राहिले पाहिजे. राजकारण कसे आहे, त्यांना चांगले माहिती आहे. त्यामुळे योग्य तो निर्णय घेतील, असा मला विश्वास आहे' अशी प्रतिक्रिया फडणवीस यांनी दिली होती. तसंच, 'एकनाथ खडसे यांच्यासोबत कोणतीही चर्चा झाली नाही. योग्यवेळी मी चर्चा करेल आणि मला पूर्ण विश्वास आहे की, खडसे हे योग्य निर्णय घेतील' अशी प्रतिक्रियाही फडणवीस यांनी व्यक्त केली होती.