शिवराजमुद्रेचा राजकीय पक्षाने वापर करणे दुर्दैव, आरआर पाटील फाऊंडेशचा मनसेला विरोध

शिवराजमुद्रेचा राजकीय पक्षाने वापर करणे दुर्दैव, आरआर पाटील फाऊंडेशचा मनसेला विरोध

मनसेच्या नव्या झेंड्यात फक्त भगवा रंग असणार आहे. तसेच मध्यभागी 'शिवराजमुद्रा' असणार आहे.

  • Share this:

मुंबई,12 जानेवारी:गेल्या काही वर्षांपासून सतत पराभवाचे धक्के खात असलेली मनसे आता कात टाकणार आहे. याचाच एक भाग म्हणून मनसेचे अध्यक्ष राज ठाकरे यांनी एक मोठा निर्णय घेतला आहे. तो म्हणजे, मनसेचा पंचरंगी झेंडा बदलण्याचा. येत्या 23 जानेवारीला मुंबईत मनसेचं महाअधिवेशन होत आहे. त्यात राज ठाकरे पक्षाचं नवं धोरण जाहीर करणार आहेत. सध्याच्या मनसेच्या झेंड्यात निळा, भगवा, पांढरा आणि हिरवा असे रंग आहेत तर मध्ये पक्षाचं चिन्ह असलेले इंजिन आहे. मात्र, नव्या झेंड्यात फक्त भगवा रंग असणार आहे. तसेच मध्यभागी 'शिवराजमुद्रा' असणार आहे. हा बदल म्हणजे मनसेची हिंदुत्वाकडे असलेली वाटचाल असल्याचे बोलले जात आहे.

दुसरीकडे, मनसेच्या नव्या झेंड्याला विरोध होत आहे. शिवराजमुद्रेचा वापर मनसेच्या ध्वजासाठी करू नये, या आशयाचा पत्र आरआर पाटील फाऊंडेशनचे विनोद पाटील यांचा मनसे अध्यक्ष राज ठाकरे यांना लिहिले आहे. शिवराजमुद्रेचा वापर कोणत्याही एका पक्षासाठी करणे म्हणजे दुर्दैव असल्याचे विनोद पाटील यांनी म्हटले आहे. मनसेच्या नव्या झेंड्यावरून भविष्यात शिवप्रेमीमध्ये असंतोष निर्माण होईल, असेही या पत्रात म्हटले आहे.

असा आहे 'मनसे'चा नवा झेंडा..

मनसेचा असलेला पंचरंगी झेंडा आता बदलणार आहे. आत्तापर्यंत मनसेच्या अजेंड्यावर मराठीच्या मुद्या अग्रभागी होता. आता त्याचसोबतच मनसे हिंदुत्वाचा मुद्दाही आक्रमकपणे लावू धरणार असल्याची माहिती सूत्रांनी दिलीय. येत्या 23 जानेवारीला मनसेचं महाअधिवेशन मुंबईत होत असून त्यात राज ठाकरे पक्षाचं नवं धोरण जाहीर करणार आहेत. मनसेच्या राजकीय वाटचालीत हा निर्णय सर्वात महत्त्वाचा ठरणार असून मनसेला हा बदल यश मिळवून देणार का याकडे सगळ्यांचं लक्ष असणार आहे.

राज्यात बदलती राजकीय परिस्थिती लक्षात घेऊन मनसेचे अध्यक्ष राज ठाकरे नवी खेळी खेळण्याच्या तयारीत आहे. शिवसेनेने भाजपशी काडीमोड घेऊन काँग्रेस आणि राष्ट्रवादीसोबत जात राज्यात सरकार स्थापन केलं. काँग्रेससोबत गेल्याने शिवसेनाला आपली कडवी भूमिका थोडी मवाळ करावी लागली होती. त्यामुळे शिवसेनेचा कट्टर हिंदुत्ववादी मतदार आपल्याकडे खेचण्यासाठी मनसे नवी भूमिका स्वीकारणार असल्याची चर्चा आहे. दरम्यान मनसेच्या या नव्या भगवीकरणावर पुण्याच्या शिवसैनिकांनी चक्क स्वागत केलंय. काहीनी तर चक्क मनसेला सेनेत विलीन करण्याचा सल्ला दिला. पण हे सांगतानाच शिवसेनेचं हिंदुत्व अद्यापही कडवटच असल्याचं सांगायला ते विसरले नाहीत.

23 जानेवारीला बाळासाहेब ठाकरे यांची जयंती आहे. यादिवशी मनसेचं महाअधिवेशन पार पडणार आहे. या अधिवेशनात राज ठाकरे पक्षाला नवी दिशा देण्यावर कार्यकर्त्यांना उभारी देणार आहे. याच दिवशी आता राज ठाकरे मराठी अस्मितेसोबतच हिंदुत्वाचीही मोट बांधणार आहेत.

काँग्रेस-राष्ट्रवादीसोबत गेल्याने शिवसेनेने हिंदुत्वाबाबात मवाळ भूमिका घेतली असल्याची चर्चा आहे. ती निर्माण झालेली पोकळी भरून काढण्यासाठी मनसे आता नवी भूमिका स्वीकारणार असल्याची चर्चा असून राज्याच्या राजकारणात नवं वादळ निर्माण होण्याची शक्यता आहे. राज ठाकरेंच्या तुफान भाषणांमुळे मनसे सुवर्णकाळ सुरू झाला. पण 2013 नंतर मात्र मनसेचा पडता काळ सुरू झाला. यानंतर प्रत्येक कार्यक्रमांमधून राज ठाकरे कार्यकर्त्यांमध्ये जोश निर्माण करत राहिले पण त्यांची मतांची झोळी रिकामी झाली. अखेर आता पक्षाला पुन्हा उभं करण्यासाठी मसने हिंदुत्वाचीही मोट बांधणार आहे.

बातम्यांच्या अपडेटसाठी लाईक करा आमच्या फेसबुक पेजला आणि टि्वटरवर फाॅलो करा

First Published: Jan 12, 2020 08:33 AM IST

ताज्या बातम्या