मुंबईत दुधाचा काळाबाजार! नामांकित कंपन्यांच्या दुधात भेसळ करणाऱ्या टोळीचा पर्दाफाश, पाहा LIVE VIDEO

मुंबई, 16 जून: तुमच्या-आमच्या आपल्या सर्वांच्याच दैनंदिन आयुष्यात दुधाचा वापर मोठ्या प्रमाणात केला जातो. मात्र, याच दुधात भेसळ (Milk adulteration) करण्यात येत असल्याचा आणखी एक धक्कादायक प्रकार उघडकीस आला आहे. मुंबईतील मालाड (Malad) आणि गोरेगाव (Goregaon) परिसरात पोलिसांनी छापा टाकून दूध भेसळ करणाऱ्या टोळीचा पर्दाफाश (Milk adulteration racket busted) केला आहे. मुंबईत दूध भेसळ होत असल्याची माहिती मुंबई क्राईम ब्रांचच्या अधिकाऱ्यांना मिळाली होती. या माहितीच्या अधिकाऱ्यांनी पोलिसांनी मुंबईतील पश्चिम उपनगर असलेल्या मालाड आणि गोरेगाव परिसरात धाड टाकली. यावेळी घटनास्थळी ही टोळी दूध भेसळ करत असताना दिसून आली. ही टोळी दूध भेसळ कशा प्रकारे करत होती या संपूर्ण घटनेचा व्हिडीओ सुद्धा समोर आला आहे.

मुंबईत दूध भेसळ टोळीचा पर्दाफाश#Mumbai #Milkadulteration #मुंबई pic.twitter.com/aWqMiNnKQ2

— News18Lokmat (@News18lokmat) June 16, 2021

मुंबईतील पश्चिम उपनगरात एका छोट्याशा खोलीत बसून ही टोळी नामांकित दूध कंपन्यांच्या पिशवीतून दूध काढून त्यात पाणी मिसळत होती. त्यानंतर लायटर, मेणबत्ती किंवा स्टोववर पिनेच्या सहाय्याने पुन्हा पिशवी सिलबंद करत होते. ही टोळी दूध भेसळ करुन पुन्हा पिशवीचं असं पॅकिंग करत होती जी पाहिल्यानंतर कुणालाही वाटणार नाही की पिशवीतील दूध भेसळयुक्त आहे. दुधाची पिशवी तपासून घ्या, मुंबईत अमुल आणि गोकुळच्या दुधात भेसळ करण्याचा भीषण प्रकार समोर घटनास्थळावरून पोलिसांनी गोकुळ आणि अमुल यासारख्या नामांकित कंपन्यांच्या पिशव्या सुद्धा जप्त केल्या आहेत. पोलिसांनी छापा टाकून जवळपास 90 लिटर भेसळयुक्त दूध जप्त करत तीन आरोपींना अटक केली आहे. गेल्या महिन्यातही अशाच प्रकारे मुंबई क्राईम ब्राँचच्या अधिकाऱ्यांनी मुंबईतील वर्सोवा परिसरात छापा टाकून दूध भेसळ करणाऱ्या टोळीचा पर्दाफाश केला होता. यावेळी पोलिसांनी तब्बल 294 लिटर भेसळयुक्त दूध जप्त केले होते आणि दोघांना अटक केली होती.