'... तेव्हा ऱ्हासाकडे प्रवास सुरू होतो','दादू' च्या राजीनाम्यानंतर राज ठाकरेंची पहिली प्रतिक्रिया

मुंबई, 30 जून : उद्धव ठाकरे (Uddhav Thackeray) यांनी राजीनामा दिल्यानंतर मनसे अध्यक्ष राज ठाकरे (Raj Thackeray) यांनी पहिली प्रतिक्रिया दिली आहे. राज यांनी ट्विट करत उद्धव ठाकरे यांना टोला लगावलाय.एखादा माणूस ज्या दिवशी आपल्या नशिबालाच स्वत:चं कर्तुत्व समजू लागतो त्या दिवसापासून त्याचा ऱ्हासाकडे प्रवास सुरू होतो, अशी पहिली प्रतिक्रिया राज यांनी व्यक्त केली आहे. उद्धव ठाकरे यांनी बुधवारी रात्री मुख्यमंत्रीपदाचा राजीनामा दिला. विश्वासदर्शक ठरावाला सामोरं जाण्यापूर्वीच त्यांनी मुख्यमंत्रीपद सोडले. राज ठाकरे यांनी गेल्या काही महिन्यांपासून महाविकास आघाडीवर जोरदार टीका केली आहे. मशिदीवरील अजानच्या भोंग्यावरून मनसेनं राज्यात मोठं आंदोलन सुरू केले होते. त्याचबरोबर औरंगाबादचं नाव संभाजीनगर करण्याच्या प्रश्नावरही राज यांनी सरकारवर टीका केली होती. राज्यसभा आणि विधान परिषद निवडणुकीतही मनसेच्या आमदारानं महाविकास आघाडी सरकारच्या विरोधात मतदान केले होते.

pic.twitter.com/sKkeGfluWF

— Raj Thackeray (@RajThackeray) June 30, 2022

'मी चिकटून बसणारा नाही' "गुळाच्या ढेपेला मुंगळा चिकटून  बसतो, तसा मी चिकटून बसणारा नाही. मी गेल्या बुधवारीच वर्षा निवासस्थान सोडून माझ्या मातोश्री निवासस्थानी आलो. मी आज आपल्या सगळ्यांसमोर मुख्यमंत्रीपदाचा देखील त्याग करत आहे. आजपर्यंत आपण सगळ्यांनी मला खूप प्रेम आणि आशीर्वाद दिला. ठिक आहे, मी घाबरणारा नाही. पण कारण नसताना उद्या जे काही बंदोबस्तात शिवसैनिकांचं रक्त सांडेल त्या पापाचे धनी जे कुणी असतील त्यांना होऊद्या. मी होणार नाही. म्हणून मी शिवसैनिकांना सांगतोय, उद्या अजिबात मध्ये येऊ नका. जे काही व्हायचंय ते होऊद्या. त्यांचा गुलाल त्यांना उधळू द्या", असं आवाहन उद्धव ठाकरे यांनी मुख्यमंत्रिदाच्या राजीनाम्याची घोषणा करताना केले होते. एखादी गोष्ट चांगली असली की त्याला दृष्ट लागते, असं म्हणतात. राष्ट्रवादी काँग्रेसचे अध्यक्ष शरद पवार आणि काँग्रेसच्या सहकाऱ्यांना धन्यवाद देतो. आजच्या बैठकीत शिवसेनेचे फक्त चार मंत्री होते. औरंगाबादच्या नामकरणाचा ठराव मांडला तेव्हा दोन्ही पक्षांनी विरोध केला नाही. त्यांचे विशेष आभार मानतो. ज्यांचा विरोध आहे असं भासवलं जात होतं ते सोबत राहिले, असं उद्धव ठाकरे यांनी यावेळी सांगितले.