'तर आम्ही लोकसभेच्या 48 जागा लढवू..' महादेव जानकरांचा भाजपला इशारा

मुंबई, 18 मार्च : भाजप आणि शिवसेनेत जागा वाटपावरून ठिणगी पडली असतानाच राष्ट्रीय समाज पक्षाचे महादेव जानकर यांनी सुद्धा युतीला इशारा दिला आहे. भाजप प्रदेशाध्यक्ष चंद्रशेखर बावनकुळे यांच्या एका विधानामुळे भाजप-शिवसेना युतीत वादाला सुरुवात झाली. आगामी विधानसभा निवडणुकीत 240 जागा लढवण्याचा भाजपाचा विचार आहे, त्यामुळे तयारीला लागा, असं आवाहन भाजप प्रदेशाध्यक्ष बावनकुळे यांनी केलं होतं. यानंतर शिवसेना शिंदे गट आक्रमक झाला आहे. हे प्रकरण शांत होत नाही तोच भाजपचा आणखी एक मित्र पक्ष असलेल्या रासपनेही भाजपला इशारा दिला आहे.

काय म्हणाले महादेव जानकर?

भाजप आणि शिवसेनेत वादात आता राष्ट्रीय समाज पक्षाचे महादेव जानकर यांनी उडी घेतली आहे. "आम्हाला घेतल्याशिवाय जर शिवसेना भाजपने जागावाटप केलं असेल तर आम्ही सुद्धा स्वतंत्र लढण्यास तयार आहोत आणि लोकसभेच्या महाराष्ट्रातील 48 ही जागा आम्ही लढवू", असा इशारा महादेव जानकर यांनी दिला आहे. भाजपला जर आमची गरज वाटत असेल तर त्यांनी सोबत घ्यावं अथवा आम्ही त्यांच्यावर अवलंबून नाहीत आम्हीही आमची ताकद दाखवून देऊ, असंही यावेळी जानकर म्हणाले. तसेच येत्या विधानसभेत आपण काही जागांची मागणी केली असून त्यावर भाजप काय निर्णय घेते हे येत्या काळात स्पष्ट होईल, असं जानकर यांनी सांगितलं.

वाचा - 'जागावाटपाटप फॉर्म्युला..' बावनकुळेंची 'त्या' विधानावरुन पलटी; म्हणाले, माझ्या विधानाचा विपर्यास

चंद्रशेखर बावनकुळे काय म्हटले होते?

बावनकुळे यांनी भाजपच्या एका खासगी कार्यक्रमात शिवसेना-भाजपमधील संभाव्या जागावाटपाचा फॉर्म्युला जाहीर केला होता. 2024 मध्ये भाजपचे 150 ते 170 आमदार 100 टक्के निवडून येतील. आपण 240 च्या आसपास सीट लढण्याच्या विचारात आहोत. एकनाथ शिंदे यांच्या गटाकडे 50 पेक्षा जास्त आमदारच नाहीत, असे बावनकुळे यांनी म्हटले. अवघ्या काही तासांमध्ये बावनकुळे यांच्या या वक्तव्याचा व्हिडिओ व्हायरल झाला.

बावनकुळे यांची सारवासरव

मी जे बोललो त्यातला केवळ अर्धाच भाग दाखवण्यात आला आहे. खरं तर शिवसेना आणि भाजप मिळून विधानसभेच्या 288 आणि लोकसभेच्या 48 जागा लढणार आहे. आम्ही एनडीएतील सर्व घटक पक्ष मिळून या जागा लढणार आहोत. विधानसभेची निवडणूक ही देवेंद्र फडणवीस आणि एकनाथ शिंदे यांच्या समन्वयानं तर पंतप्रधान नरेंद्र मोदी आणि गृहमंत्री अमित शाह यांच्या मार्गदर्शनाखाली लढवली जाईल.

आम्ही काय मुर्ख आहोत का : संजय शिरसाट

शिवसेना आमदार संजय शिरसाट यावर प्रतिक्रिया देताना म्हणाले, "चंद्रशेखर बावनकुळे यांच्या स्टेटमेंटमध्ये दम नाही. त्यांना एवढे अधिकार कोणी दिले, हे माहिती नाही? अशा वक्तव्यामुळे युतीमध्ये वाद निर्माण होतो, याची जाणीव बावनकुळे यांना असायला पाहिजे. आम्ही काय मुर्ख आहोत का फक्त 48 जागा लढवायला? दोन्ही पक्षातील जागावाटपासाठी वरिष्ठ पातळीवर निर्णय घेतला जाईल, अशी तिखट प्रतिक्रिया शिरसाट यांनी दिली आहे.