मुंबईत का झाली बत्ती गूल? ऊर्जामंत्री नितीन राऊत यांची प्रतिक्रिया, VIDEO

मुंबई, 12 ऑक्टोबर : राज्याची राजधानी असलेल्या मुंबईवर आज सकाळी वीज संकट कोसळले. संपूर्ण मुंबई शहरात वीज पुरवठा अचानक ठप्प झाला आहे. त्याचबरोबर ठाण्यासह इतर शहरांमध्येही बत्ती गूल झाली.  राज्याचे ऊर्जामंत्री नितीन राऊत यांनी  कळवा पडघा GIS केंद्रात तांत्रिक बिघाड झाल्यामुळे वीज पुरवठा ठप्प झाल्याचे सांगितले आहे. नितीन राऊत यांनी न्यूज18 लोकमतला मुंबईत वीज पुरवठा खंडीत झाल्याबद्दल प्रतिक्रिया दिली आहे. 'महापारेषणच्या 400 KV कळवा पडघा GIS केंद्रात सर्किट 1 देखभाल-दुरुस्ती सुरू होते. त्यावेळी सर्व भार हा सर्किट दोनवर टाकण्यात आला होता. मात्र, सर्किट दोनमध्ये अचानक तांत्रिक बिघाड झाल्यामुळे मुंबईसह उपनगरांमध्ये वीज पुरवठा खंडीत झाला आहे' अशी माहिती राऊत यांनी दिली.

मुंबईत वीज पुरवठा ठप्प झाला, ऊर्जा मंत्री नितीन राऊत यांची प्रतिक्रिया #powercut pic.twitter.com/NDzMghfbeS

— News18Lokmat (@News18lokmat) October 12, 2020

तसंच, 'वीज पुरवठा अर्ध्या तासात सुरू होऊन जाईल, असं आश्वासनही  नितीन राऊत यांनी दिले. दरम्यान, मुंबईला वीज पुरवठा करणाऱ्या बेस्ट इलेक्ट्रीकने ट्वीट करून माहिती दिली आहे.  'टाटा इलेक्ट्रिककडून येणाऱ्या विद्युत पुरवठ्यात बिघाड झाल्यामुळे विद्युत पुरवठा खंडित झाला आहे.' अशी माहिती बेस्टने दिली आहे. तसंच, झालेल्या  गैरसोयीबद्दल बेस्टने दिलगिरी व्यक्त केली आहे. लोकल आणि लांब पल्ल्याच्या गाड्या थांबल्या वीज पुरवठा ठप्प झाल्यामुळे लोकल सेवेवरही परिणाम झाला आहे. मुंबईतील लोकल ठप्प झाल्या आहे. सर्व स्थानकांवर लोकल थांबलेल्या आहे. मध्य रेल्वेवर लोकल गाड्या जागच्या जागी थांबल्या आहे. कुर्ला, दादर, डोंबिवली, कळवा स्थानकावर लोकल थांबल्या आहे. गेल्या अर्ध्या तासापासून प्रवासी लोकलमध्ये खोळंबले आहे. वीज पुरवठा ठप्प झाल्यामुळे लांब पल्ल्यांच्या गाड्यांवर झाला आहे. मुंबईकडे येणाऱ्या आणि मुंबईतून जाणाऱ्या गाड्या स्थानकांवर थांबलेल्या आहे. कल्याणमध्ये वीज पुरवठा ठप्प ग्रीड फेल्युअरमुळे कल्याण भागाला टाटा पॉवरकडून वीजपुरवठा होणारे केबी-1 व केबी-2 हे दोन फिडर बंद आहेत. केबी-2 फिडरवरून कल्याण पश्चिमेला वीजपुरवठा होतो. कल्याण पश्चिमेतील वायलेनगर, पारनाका, दुर्गाडी, गांधारी रोड, आधारवाडी परिसरातील जवळपास 50 हजार ग्राहकांचा वीजपुरवठा बाधित झाला आहे. तर केबी-1 फिडरवरून वीजपुरवठा होणाऱ्या कल्याण पूर्वेतील 90 फूट रोड, टाटा नेतीवली परिसरातील सुमारे 10 हजार ग्राहकांचा वीजपुरवठा बाधित झाला आहे. या फिडरवरील वीज ग्राहकांना पर्यायी फिडरमार्फत वीजपुरवठा सुरू करण्यात येत आहे. आतापर्यंत 16 हजार ग्राहकांचा वीजपुरवठा पर्यायी मार्गाने सुरू करण्यात आला आहे. वरील फिडर वगळता इतर सर्व ठिकाणी वीजपुरवठा सुरळीत आहे.