'मुंबईतील corona चे चित्र फसवे, दिशाभूल आणि बनवाबनवी थांबवा', फडणवीसांचं मुख्यमंत्र्यांना पत्र

मुंबई, 08 मे : विरोधी पक्षनेते देवेंद्र फडणवीस (Devendra Fadnavis) यांनी मुख्यमंत्री उद्धव ठाकरे (Uddhav Thackeray) यांना पत्र लिहून कोविड संदर्भात गंभीर आरोप केले आहेत. मुंबईतील कोरोनाचे (Mumbai corona situation) आकडे कमी होत असल्याचे आभासी आकडे दाखवण्यासाठी लपवाछपवी केली जात असल्याचा आरोप फडणवीस यांनी केला आहे. त्याचबरोबर सेलिब्रिटी आणि पीआर कंपन्यांचा वापर केला जात असल्याचा आरोपही फडणवीस यांनी केला आहे. (वाचा-BIG NEWS : Oxygen Supply साठी सुप्रीम कोर्टाकडून राष्ट्रीय टास्क फोर्सची स्थापना) राज्यात मुंबईमध्ये कोरोनाच्या रुग्णांची संख्या, पॉझिटिव्हिटी रेट आणि मृत्यू दर गेल्या काही दिवसांत कमी होत आहे. पण राज्य सरकार खरे आकडे लपवून हे आभासी चित्र तयार करत असल्याचा आरोप विरोध पक्षनेते देवेंद्र फडणवीस यांनी केला आहे. फडणवीस यांनी मुख्यमंत्री उद्धव ठाकरे यांना पत्र लिहून हा आरोप केला आहे. कोविडमुळं झालेल्या मृत्यूचे आकडे सरकार लपवत असल्याचं फडणवीस म्हणाले. मुंबईत कोरोनापेक्षा इतर कारणांमुळं होणाऱ्या मृत्यूचं प्रमाण प्रचंड वाढवून दाखवलं जात असल्याचा आरोप फडणवीस यांनी पत्रात केला आहे.

मुंबईतील कोविड मृत्यूंची नेमकी आकडेवारी उजेडात येऊ न देणे, चाचण्यांच्या प्रकारातील तडजोडी करीत कोरोनाचा संसर्ग दर कमी होत असल्याचे आभासी चित्र उभे करणे आणि त्यातून कोरोना संकटाची प्रत्यक्ष स्थिती निदर्शनास न येता लढ्यात बाधा उत्पन्न होणे,याबाबत मुख्यमंत्री उद्धव ठाकरे यांना पत्र pic.twitter.com/NigmpjOfcX

— Devendra Fadnavis (@Dev_Fadnavis) May 8, 2021

कोरोनाची रुग्णसंख्या कमी होण्यामागंही चाचण्या कमी करणं हे कारण असल्याचा आरोप फडणवीस यांनी केला आहे. 1 लाख क्षमता असतानाही केवळ 34 हजाराच्या आसपास चाचण्या केल्या जात असल्याचं त्यांनी पत्रात म्हटलं आहे. त्यातही अँटिजेनचं प्रमाण 30 टक्के आहे. ज्याठिकाणी आरटीपीसीआर चाचण्या करणं शक्य आहे तिथं अँटिजेनचं प्रमाण 10 टक्क्यांपेक्षा अधिक असता कामा नये, असंही या पत्रात फडणवीस यांनी म्हटलं आहे. त्यासाठी फडणवीस यांनी दिवसानुसार आकडेवारी पत्रात मांडली आहे. संसर्ग कमी होत असल्याचे दाखवण्यासाठी चाचण्या नियंत्रित केल्या जात असल्याचं स्पष्ट होत असल्याचा आरोप त्यांनी केला. (वाचा-आता छातीच्या X-Ray वरूनच समजणार तुम्ही कोरोना पॉझिटिव्ह की निगेटिव्ह?) कोरोनाच्या तिसऱ्या लाटेसाठी तयार असल्याचा दावा करताना पीआर संस्थेमार्फत जनतेपुढं चित्र निर्माण करण्याचं कारण काय असा सवाल, फडणवीस यांनी पत्रात केला आहे. हा प्रकार कोरोना विरोधातील राज्य सरकारचा संघर्ष कमकुवत करणारा आहे. त्यामुळं ही बनवाबनवी आणि पीआरमार्फत जनतेची दिशाभूल करणं थांबवण्याचे आदेश द्या अशी विनंती फडणवीस यांनी मुख्यमंत्र्यांना या पत्राद्वारे केली आहे.