मौन सोडा, जनतेसाठी बोला, प्रियांका गांधींची मोदींवर टीका; देवेंद्र फडणवीसांनाही सुनावलं

मुंबई, 28 मे : 'आज देशातील जनता त्रस्त आहे. शेकडो मजूर पायी प्रवास करत आहे. श्रमिक रेल्वेत मजुरांचा मृत्यू होत आहेत. आपली भारत माता रडत आहे आणि तुम्ही मौन धारण करून बसला आहात. तुम्ही काहीच बोलत नाही आणि समोरही मदतीसाठी येत नाही' असं म्हणत काँग्रेसच्या नेत्या प्रियांका गांधी यांनी पंतप्रधान नरेंद्र मोदी यांच्यावर टीका केली आहे. तसंच, महाराष्ट्रातील भाजप नेत्यांनाही अशा परिस्थितीत राजकारण करू नये, असं आवाहन केलं आहे. काँग्रेसने आज देशभरात #SpeakUpIndia या मोहिमेखाली मोदी सरकारविरोधात अभिनव आंदोलन केलं. यावेळी प्रियांका गांधी यांनी महाविकास आघाडी सरकारची जोरदार पाठराखण करत भाजप नेत्यांना खडेबोल सुनावले आहे. महाराष्ट्रात कोरोनाबाधित रुग्णांची संख्या मोठी आहे. राज्य सरकार कोरोनावर मात करण्यासाठी युद्धपातळीवर प्रयत्न करत आहे. पण, भाजपकडून सरकार अस्थिर करण्याचा प्रयत्न सुरू आहे. सरकार पाडण्याचा डाव आखला जात आहे. सध्या राजकारण करण्याची वेळ नाही. देशातील जनतेचं आपल्यावर ऋण आहे. त्यांच्यासाठी एकत्र येण्याची गरज आहे' असं आवाहन प्रियांका गांधींनी भाजप नेत्यांना केलं.

हम सबका कर्तव्य है कि हम साथ मिलकर जरुरतमंदों की मदद के लिए आवाज उठाएं। मैं आवाज उठा रही हूं, आप भी उठाएं। #SpeakUpIndia https://t.co/sL9Bi7mhuC

— Priyanka Gandhi Vadra (@priyankagandhi) May 28, 2020

योगी आदित्यनाथ यांच्यावर टीका भाजपकडून अशाही परिस्थितीत राजकारण केले जात आहे. राजकारण बंद करा. राजकारण करण्याची ही वेळ नाही. आताच्या परिस्थितीत सर्वांनी एकत्र येण्याची गरज आहे. राजकीय पक्षांनी आपले मतभेद बाजूला ठेवून मदतीसाठी पुढे आलं पाहिजे.  युपीमध्ये आमच्या हजारो बसेस थांबवण्यात आल्या होत्या. जर तुम्हाला तुमच्या पक्षाचे स्टिकर लावायचे असेल तर खुशाला लावा, पण गाड्या अडवू नका, अशी टीकाही प्रियांका गांधी यांनी योगी आदित्यनाथ सरकारवर केली. 'भारत माता रडतेय आणि तुम्ही मौन धारण केलंय' 'या देशातील लोकांनी आपल्याला साथ दिली. त्यामुळे आपण सत्तेत येऊ शकलो, या जनतेनं  विजयात तुमचा जयजयकार केला आहे. आज देशातील जनता त्रस्त आहे. एक मुलगा आपल्या आई-वडिलांना हजारो किलोमीटर पायी घेऊन जात आहे. कुठे एखादी मुलगी शेकडो किलोमीटर आपल्या वडिलांना सायकलीवर घेऊन जात आहे. श्रमिक रेल्वेत मजुरांचा मृत्यू होत आहेत. देशातली एक-एक आई रडत आहे. आपली भारत माता रडत आहे आणि तुम्ही मौन धारण करून बसला आहात. तुम्ही काहीच बोलत नाही आणि समोरही मदतीसाठी येत नाही' अशी टीका प्रियांकांनी पंतप्रधान मोदींवर केली. तसंच, 'आम्ही काही राजकीय मागणी करत नाही. आम्ही माणुसकीच्या नात्यातून  तुम्हाला आग्रह करतोय की, या जनतेनं तुम्हाला मोठं केलं आहे. त्यामुळे या संकटकाळात तुम्ही सर्वांची मदत करावी' असं आवाहनही त्यांनी मोदींना केलं आहे. त्याचबरोबर देशातील  प्रत्येक गरजू लोकांच्या खात्यात 10 हजार रुपये टाकण्यात यावे. आणि प्रत्येक महिन्याला 7,500 रुपये देण्यात यावे.  जे छोटे व्यापारी आहे. त्यांच्यासाठी एक विशेष पॅकेज जाहीर करावे, ज्यामुळे त्याच्यावर कोणताही कर्जाचा बोजा पडणार नाही, अशी मागणीही प्रियांका गांधींनी केली. संपादन - सचिन साळवे