'सध्या संसद भवन नव्हे माणसं वाचवणं गरजेचं', खासदार निधीसाठी अमोल कोल्हेंची पंतप्रधानांना आर्त हाक

मुंबई, 26 एप्रिल : देशात कोरोनाच्या कहरामुळं माणसं मरत आहेत. अशा परिस्थितीत संसद भवन (New Parliament Building) किंवा इतर गोष्टींपेक्षा माणसं वाचवणं जास्त गरजेचं आहे. त्यामुळं मतदारसंघांमध्ये आरोग्य सुविधा (Health Infrastructure) उभारण्यासाठी खासदार निधी उपलब्ध करून देण्याची आर्त मागणी खासदार डॉ. अमोल कोल्हे (Dr. Amol Kolhe) यांनी पंतप्रधानांकडं केली आहे. (वाचा-पुणे तिथे काय उणे! 20 किमीपर्यंत मोफत रुग्णवाहिका सेवा, शहरात होतंय कौतुक) खासदार डॉक्टर अमोल कोल्हे यांनी एक व्हिडिओ शेअर करत पंतप्रधान नरेंद्र मोदींकडं ही मागणी केली आहे. पंतप्रधान नरेंद्र मोदी यांना याबाबत पत्र पाठवल्याचंही कोल्हे यांनी सांगितलं आहे. खासदारांना यापूर्वी न मिळालेला जवळपास 196 कोटी रुपयांचा खासदार निधी पडून आहे. त्यानंतरच्या वर्षीचा 5 कोटी खासदार निधी देण्यात आलेला नाही असं डॉ. कोल्हे म्हणाले. सध्याची कोरोनाची संकटाची स्थिती पाहिली तर प्रत्येक मतदारसंघामध्ये आरोग्य सुविधा उभं करणं अत्यंत गरजेचं आहे. त्यामुळं जर हा निधी मिळाला तर त्याचा मोठा फायदा होणार असल्याचं कोल्हे यांनी म्हटलं आहे.

खासदारकीचा निधी मिळावा यासाठी अमोल कोल्हेंनी पंतप्रधान मोदींना लिहिलं पत्र..पाहा काय म्हणतायेत... pic.twitter.com/DLbf8eFbka

— News18Lokmat (@News18lokmat) April 26, 2021

महाराष्ट्रात 48 खासदार आहेत. जर त्यांना त्यांच्या मतदारसंघासाठीचा निधी दिला तर त्यांना संपूर्ण राज्यभरात या माध्यमातून मोठी आरोग्य सुविधा उभी करता येऊ शकते. गरज असेल त्यानुसार जम्बो कोविड सेंटर, ऑक्सिजन प्लांट यासाठी हा निधी लोकप्रतिनिधी वापरू शकतील. त्याद्वारे आरोग्य व्यवस्था बळकट करता येईल असं कोल्हेंनी म्हटलं आहे. पंतप्रधानांकडे तशी मागणी त्यांनी पत्राद्वारे केली आहे. आजच्या घडीला संसद भवन किंवा इतर गोष्टींपेक्षा माणसं वाचवणं गरजेचं आहे. त्यामुळं हा निधी देण्याची मागणी कोल्हेंनी केली. कोल्हेंनी त्यांच्या सोशल मीडिया अकाऊंट्सवर यापूर्वीदेखिल संसदभवन किंवा इतर गोष्टींपेक्षा आरोग्य व्सवस्था बळकट करण्याची मागणी केलेला व्हिडिओदेखिल शेअर केला आहे.

आता तरी पटतंय ना ? ज्या देशाच्या आरोग्यव्यवस्थेच्या मर्यादा कोरोनामुळे उघड्या पडल्या तिथं काय पाहिजे? नवं संसदभवन की सुसज्ज हॉस्पीटल ? आंधळी भक्ती आणि व्यक्तीपूजेपेक्षा देशातील नागरिकांचे आरोग्य आणि हित सर्वाधिक महत्वाचं आहे.#PMOIndia#IndiaFightsCorona#COVIDSecondWaveInIndia pic.twitter.com/4ZZgWJUB6q

— Dr.Amol Kolhe (@kolhe_amol) April 20, 2021

राज्य सरकारचं कौतुक महाराष्ट्र सरकारनं सर्व आमदारांना त्यांच्या आमदार निधीपैकी 1 कोटी रुपयांचा निधी कोविडच्या कामांसाठी वापरण्याची परवानगी दिली आहे. राज्य सरकारच्या या निर्णयाचं अमोल कोल्हेंनी कौतुक केलं. अशाच प्रकारचा निर्णय केंद्रानं घेतल्यास लोकप्रतिनिधींना त्यांच्या मतदारसंघांमध्ये कामं करता येईल असं कोल्हे म्हणाले. (वाचा-मुंबईला सेवा देणाऱ्या कर्मचाऱ्यांची दुरावस्था; जागा नाही म्हणून ST वर मुक्काम) केंद्र सरकार आणि विरोधी पक्षातील नेते विविध मुद्द्यांवरून सध्या आमने-सामने उभे असल्याचं पाहायला मिळत आहे. त्यात अमोल कोल्हे यांनी आता पुन्हा एकदा खासदार निधीचा मुद्दा उपस्थित केल्यानं यावरून आता परत नेत्यांमध्ये आरोप प्रत्यारोपांचं सत्र सुरू होण्याची शक्यता नाकारता येत नाही.