केंद्रीय गृहमंत्री अमित शाह यांचा मास्टरस्ट्रोक, सांगितला विजयाचा फॉर्म्युला

मुंबई : केंद्रीय गृहमंत्री अमित शाह यांनी रायझिंग इंडियामध्ये अनेक खुलासे केले आहेत. यावेळी त्यांनी कर्नाटक निवडणुकीच्या विजयाचा फॉर्म्युला सांगितला आहे. राहुल गांधींमुळेच आम्हाला विजय मिळेल असं अमित शाह यांनी सूचक वक्तव्य केलं आहे.

जिथे राहुल गांधींनी मोदी आडनावाबद्दल अपशब्द वापरला तिथे रॅली घेत आहेत. सध्या झालेल्या सगळ्या घडामोडींनंतर राहुल गांधी सहानुभुती मिळवण्यासाठी हे करत आहेत का? या प्रश्नावर अमित शाह म्हणाले की मला यामध्ये कोणतीही अडचण वाटत नाही. प्रत्येक व्यक्तीला स्वातंत्र्य आहे.

राहुल गांधींना जर कर्नाटकामधून रॅलीची सुरुवात करायची असेल तर त्यांनी करावी. आम्ही रोखणारे कोण? प्रत्येकाला स्वातंत्र्य आहे. मला कोणतीही अडचण नाही. मोदी विरुद्ध राहुल असं करणार असतील तरी मला काही अडचण नाही, कारण भाजपाच्या विजयाचा यापेक्षा मोठा कोणताही फॉर्म्युला असूच शकत नाही असं मला वाटतं.

View this post on Instagram

A post shared by news18lokmat (@news18lokmat)

राहुल गांधींना कोणता अहंकार?

काँग्रेस नेते भ्रम पसरवण्याचा प्रयत्न करत आहेत. कोणत्याही व्यक्तीला 2 वर्षांची शिक्षा झाली तर प्रत्येक व्यक्तीला शिक्षेला आणि दोषाला स्टे करायला 3 महिन्यांचा वेळ मिळायचा. कनव्हिक्शन स्टे करता येत नाही, शिक्षा स्टे करता येते. पण थॉमस केसमध्ये सुप्रीम कोर्टाने 3 महिन्यांचं प्रावधान काढून टाकलं. लालूंना वाचवण्यासाठी मनमोहन सरकार अध्यादेश घेऊन आले. पण तो अध्यादेश राहुल गांधींनी फाडला. तो अध्यादेश असता तर राहुल गांधींची खासदारकी वाचली असती.

राहुल गांधींनी अजूनही या निकालाला आव्हान दिलेलं नाही, त्यांच्यात कोणता अहंकार आहे? लालू प्रसाद यादव, जयललिता, राशिद अल्वी यांच्यासह 17 जणांची खासदारकी गेली. पण कुणीही काळे कपडे घातले नाहीत. सुप्रीम कोर्टाचा निर्णय आहे. देशाच्या एका व्यक्तीसाठी कायदा बदलायचा का? असा सवाल अमित शाह यांनी विचारला.

ते कायदा वाचणार नाहीत, त्यांना समजणारही नाही. पण काँग्रेसकडे राज्यसभेत बसणारे मोठे वकील आहेत, तेही काही समजावत नाही. लोकसभा अध्यक्षही काही करू शकत नाहीत. ज्या वेळी तुम्ही दोषी ठरलात तेव्हाच तुमचं सदस्यत्व गेलं, असं अमित शाह म्हणाले.

त्यांना मोदी विरुद्ध राहुल करूदे, भाजपसाठी विजयाचा यापेक्षा मोठा फॉर्म्युला कोणता असेल? त्यांनी फक्त मोदींना नाही, तर मोदी समाज म्हणजेच तेली समाजाविषयी ते बोलले. सगळ्या चोरांचं आडनाव मोदीच का असतं? असं ते म्हणाले. त्यांनी ओबीसी समाजाचा अपमान केला, असा आरोप अमित शाह यांनी केला.