एसटी महामंडळाच्या मेगा भरतीत महिला उमेदवारांसाठी मोठा निर्णय

भरती प्रक्रियेतून निवड झाल्यानंतर संबंधीत महिला उमेदवारांना एसटी महामंडळामार्फत अवजड वाहन चालविण्याचे प्रशिक्षण देण्यात येणार आहे

News18 Lokmat | Updated On: Feb 8, 2019 07:07 PM IST

एसटी महामंडळाच्या मेगा भरतीत महिला उमेदवारांसाठी मोठा निर्णय


स्वाती लोखंडे, प्रतिनिधी

मुंबई, 8 फेब्रुवारी : एसटी महामंडळामार्फत सध्या चालक तथा वाहक पदांच्या भरतीची प्रक्रिया सुरू आहे. या भरतीमध्ये आता हलके वाहन चालविण्याचा १ वर्षाचा परवाना असलेल्या महिलांनाही अर्ज करता येणार आहे. भरती प्रक्रियेतून निवड झाल्यानंतर संबंधीत महिला उमेदवारांना एसटी महामंडळामार्फत अवजड वाहन चालविण्याचे प्रशिक्षण देण्यात येणार आहे, अशी घोषणा परिवहन मंत्री तसंच एसटी महामंडळाचे अध्यक्ष दिवाकर रावते यांनी केली.

याबरोबरच महिला उमेदवारांना शारीरीक उंचीच्या अटीमध्येही सवलत देण्यात आली असून ही अट किमान 160 सेंमीवरुन किमान 156 सेंमी करण्यात आली आहे. तसेच पुरुष उमेदवारांसाठी अवजड वाहन चालविण्याच्या अनुभवाची अट शिथील करण्यात आली असून 3 वर्षाऐवजी 1 वर्षाचा अनुभव असलेले पुरुष उमेदवारही अर्ज करु शकणार आहेत.

महामंडळामार्फत राज्यात सध्या 8 हजार 22 इतक्या चालक तथा वाहन पदाची भरती सुरू आहे. यापैकी दुष्काळग्रस्त 12 जिल्ह्यांमध्ये 4 हजार 416 तर उर्वरीत जिल्ह्यांमध्ये 3 हजार 606 इतकी पदे भरली जाणार आहेत. दुष्काळग्रस्त 12 जिल्ह्यांसाठी अर्ज करण्याच्या मुदतीस 15 फेब्रुवारीपर्यंत मुदतवाढ देण्यात आली आहे. आधीच्या नियोजनानुसार अर्ज करण्याची मुदत आज दि. 8 फेब्रुवारी रोजी संपणार होती. इतर जिल्ह्यांसाठी 15 फेब्रुवारीपर्यंत अर्ज करण्याची मुदत आहे. या पदांसाठी 24 फेब्रुवारी रोजी संबंधीत जिल्ह्यांमध्ये एकाच वेळी लेखी परिक्षा होणार आहे.

Loading...

रावते म्हणाले की, महिला सक्षमीकरणाच्या दृष्टीने एसटी महामंडळाने नेहमीच आग्रहाची भूमिका घेतली आहे. महामंडळामार्फत नुकतीच 21 आदिवासी युवतींची बसचालक पदावर भरती करण्यात आली आहे. या युवतींचे सध्या प्रशिक्षण सुरू असून त्या लवकरच एसटीच्या बसेस चालवताना दिसतील. महामंडळातील नोकरीमुळे ग्रामीण भागातील होतकरु आणि गोरगरीब तरुणांना रोजगाराची संधी मिळत आहे. यामध्ये अनेक युवतीही एसटीच्या नोकरीसाठी पुढे येताना दिसत आहेत. त्यांना प्रोत्साहन देण्यासाठी एसटी महामंडळ प्रयत्न करत आहे, असे त्यांनी सांगितले.

पुढे रावते म्हणाले की, सध्या सुरू असलेल्या भरतीमध्ये महिलांसाठी 30 टक्के जागा राखीव ठेवण्यात आल्या आहेत. यासाठी आजअखेर 289 महिला उमेदवारांनी अर्ज केला आहे. महामंडळाने अधिकाधिक महिला उमेदवारांना या भरती प्रक्रियेत स्थान देण्याच्या उद्देशाने आज काही महत्वपूर्ण निर्णय घेतले आहेत. त्यानुसार हलके वाहन चालविण्याचा 1 वर्षाचा परवाना असलेल्या महिलांनाही या भरती प्रक्रियेत सहभागी होता येणार आहे. सध्या या पदासाठी महिला उमेदवारांनाही अवजड वाहन चालविण्याचा परवाना असणे बंधनकारक होते. ही अट रद्द करण्यात आली आहे. परिक्षेअंती ज्या महिलांची निवड होईल त्यांना महामंडळामार्फत 1 वर्षाचे अवजड वाहन चालविण्याचे प्रशिक्षण देण्यात येईल. या प्रशिक्षण कालावधीत त्यांना महामंडळामार्फत विद्यावेतनही देण्यात येणार आहे. प्रशिक्षणानंतर महिला उमेदवारांना आरटीओकडून रितसर अवजड वाहन चालविण्याचा परवाना प्राप्त झाल्यानंतर या महिला एसटीच्या बस चालवू शकतील, असे ते म्हणाले.

महिला उमेदवारांना प्रोत्साहन देण्याच्या उद्देशाने त्यांच्या शारीरीक उंचीची अट शिथील करुन ती आता किमान 160 सेंमीवरुन किमान 153 सेंमी इतकी कमी करण्यात आली आहे, अशी माहितीही रावते यांनी दिली.

अनुभवाच्या अटीतही शिथीलता देण्याचा निर्णय

चालक तथा वाहक पदासाठी पुरुष उमेदवारांना अवजड वाहन चालविण्याचा 3 वर्षांचा अनुभव आवश्यक आहे. या अनुभवाच्या अटीमध्ये आता शिथीलता करण्यात आली आहे. त्यानुसार अवजड वाहन चालविण्याचा 1 वर्षाचा अनुभव असलेले उमेदवारही या पदासाठी आता अर्ज करू शकतील, अशी घोषणाही रावते यांनी केली.

अवजड वाहन चालवण्याचा 3 वर्षाचा अनुभव असलेले पुरेसे उमेदवार मिळत नसल्याचे मागील भरती प्रक्रियेत दिसून आले होते. त्यामुळे ही अट शिथील करण्यात येत असल्याचं रावते यांनी सांगितलं.

=====================================

बातम्यांच्या अपडेटसाठी लाईक करा आमच्या फेसबुक पेजला आणि टि्वटरवर फाॅलो करा

First Published: Feb 8, 2019 07:07 PM IST
Loading...

ताज्या बातम्या

Loading...