मानसिकदृष्ट्या अस्वस्थ अल्पवयीन मुलीवर बलात्कार; वडील, मुलाला दहा वर्षांची शिक्षा

ठाणे, 3 मे : मानसिकदृष्ट्या अस्वस्थ आणि अल्पवयीन मुलीवर अनेकदा बलात्कार (Rape on Minor) केल्याची धक्कादायक घटना 2017 मध्ये समोर आली होती. याप्रकरणी आरोपी आणि त्याच्या मुलाला 10 वर्षांची सश्रम कारावासाची (Rigorous Imprisonment) शिक्षा सुनावण्यात आली आहे. ठाणे जिल्ह्याच्या विशेष पोक्सो न्यायालयाने (Special POCSO Court of Thane District) हा निर्णय दिला.

विशेष पोक्सो (बाल लैंगिक गुन्ह्यांचे संरक्षण) न्यायालयाच्या न्यायाधीश कविता डी. शिरभाते यांनी सोमवारी या प्रकरणाचा निकाल दिला. दोन्ही आरोपींना भारतीय दंड संहिता आणि पॉक्सो कायद्यांतर्गत दोषी ठरवून त्यांना पाच हजार रुपयांचा दंडही ठोठावण्यात आला.

2017 मध्ये घडली होती घटना -

विशेष सरकारी वकील संजय मोरे यांनी न्यायालयाला सांगितले की, 52 वर्षाचा व्यक्ती आणि त्याच्या 25 वर्षाच्या मुलाने 2017 मध्ये अनेक वेळा भिवंडीतील आपल्या घरात मुलीवर बलात्कार केला. त्यावेळी पीडित मुलीचे वय 15 वर्ष इतके होते. त्यांनी सांगितले की, यानंतर मुलगी गरोदर राहिली होती. तसेच तिने शेजाऱ्यांना याबाबत सांगितले. यानंतर शेजाऱ्यांनी तिला कोनगाव पोलीस ठाण्यात तक्रार दाखल करायला पीडित मुलीची मदत केली. या प्रकरणाची माहिती पोलिसांना मिळाल्यानंतर दोनही आरोपींना अटक करण्यात आली होती.