जीव धोक्यात घालून विद्यार्थ्यांना रोज चढावे लागते पाण्याच्या टाकीवर, शिक्षकही झाले हैराण, VIDEO

अकोला, 03 ऑक्टोबर : आपण आतापर्यंत  विविध मागण्यांसाठी शोले स्टाईल आंदोलन करणारे सामाजिक कार्यकर्ते बघितले असतील. परंतु, आता शालेय विद्यार्थी पाण्याचा टाकीवर चढत आहेत. वह्या-पुस्तकं घेऊन हे विद्यार्थी थेट पाण्याच्या टाकीवरच पोहोचले आहे. हातात पुस्तक घेऊन, जीव धोक्यात टाकून गावाला पाणीपुरवठा करणाऱ्या पाण्याच्या टाकीच्या लोखंडी शिडीवर बसलेले हे विद्यार्थी अकोल्याच्या बोडखा गावातील आहेत. पुस्तक हातात घेऊन हे विद्यार्थी टाकीवर का चढले असावे, असा प्रश्न तुम्हाला पडला असेल. यांचं कारणंही तितकच महत्त्वाचं आहे.

#अकोला : विद्यार्थी पाण्याचा टाकीवर चढून करताय 'विरू'गिरी pic.twitter.com/RYlooMM4yA

— News18Lokmat (@News18lokmat) October 3, 2020

सध्या कोरोनाच्या उद्रेकामुळे शासनाने शाळा, महाविद्यालय बंद ठेवली आहेत. विद्यार्थ्यांचे शैक्षणिक नुकसान होऊ नये म्हणून ऑनलाइन शिक्षण सुरू करण्यात आलं आहे. मात्र, अकोल्यातील बोडखा गावात मोबाईल नेटवर्कच नाही. त्यामुळे नेटवर्क मिळवण्यासाठी विद्यार्थ्यांना पाण्याच्या टाकीची मदत घ्यावी लागते. पाण्याच्या टाकीवर चढल्यावर नेटवर्क मिळत असल्याने, ठराविक वेळेत विद्यार्थी पाण्याच्या टाकीवर चढतात आणि अभ्यास करता, हे वास्तव समोर आलंय. अशाप्रकारे पाण्याच्या टाकीवर चढून विद्यार्थ्यांचं अभ्यास करणे, धोकादायक आहे. परंतु, धोका पत्कारून विद्यार्थ्यांना अभ्यास करावा लागतो हे आपलं दुर्दैवच आहे, असं बोडखा शाळेतील शिक्षक रणजित राठोड म्हणाले. कोरोनाच्या पार्शवभूमीवर ऑनलाइन शिक्षण सुरू करण्यात आले आहे. त्यामुळे शासनाने सुरू केलेल्या ऑनलाइन शिक्षणात विद्यार्थ्यांना अडथळा निर्माण होत आहे. विद्यार्थ्यांची शैक्षणिक नुकसान होऊ नये म्हणून शासनाने आणि मोबाईल कंपन्यांनी नेटवर्कची सुविधा आणखी सुधारावी अशी मागणी होत आहे. देशाचे भविष्य विद्यार्थी आहेत, मात्र, याच विद्यार्थ्यांचं शैक्षणिक भविष्यात मोबाईल नेटवर्कमुळे अंधार होण्याची वेळ आली आहे.