महाराष्ट्रातील राज्यपालांवर शरद पवार नाराज? मोदींसोबतच्या चर्चेत मांडला 'हा' मुद्दा

महाराष्ट्रातील राज्यपालांवर शरद पवार नाराज? मोदींसोबतच्या चर्चेत मांडला 'हा' मुद्दा

शरद पवार यांनी नरेंद्र मोदी यांच्यासोबतच्या चर्चेवेळी मांडलेला राज्यपालांच्या हस्तक्षेपाचा मुद्दा चर्चेचा विषय ठरत आहे.

  • Share this:

मुंबई, 8 एप्रिल : राष्ट्रवादीचे अध्यक्ष शरद पवार हे महाराष्ट्राचे राज्यपाल भगतसिंग कोश्यारी यांच्या भूमिकेबाबत नाराज आहेत का, अशी चर्चा सुरू झाली आहे. कारण कोरोनाच्या पार्श्वभूमीवर झालेल्या सर्वपक्षीय बैठकीत शरद पवार यांनी पंतप्रधानांसोबत अर्थव्यवस्था, उद्योग शेती अशा अनेक मुद्द्यांवर चर्चा केली, पण त्याचवेळी अप्रत्यक्षपणे राज्यपालांवरील आपली नाराजी व्यक्त केली आहे.

'राज्यपातळीवर काही राज्यांमध्ये असे ऐकावयास मिळते की माननीय राज्यपालांकडून देखील थेट कार्यकारी वर्गाला सूचना निर्गमित होतात. राज्यपाल महोदयांना राज्याच्या बाबतीत सल्लामसलत करण्याचे अधिकार आहेत. ते त्यांनी जरूर वापरावेत. मात्र मुख्यमंत्री आणि राज्याचे मुख्य सचिव यांच्यामार्फत तसे झाल्यास राज्यात दोन सत्ताकेंद्रे होणार नाहीत. तसेच समन्वयामध्ये चूक होणार नाही असे मला वाटते,' असं शरद पवार यांनी म्हटलं आहे.

शरद पवार यांनी थेटपणे कुठेच महाराष्ट्राच्या राज्यपालांचं नाव घेतलं नाही. मात्र याआधीदेखील महाविकास आघाडीचं सरकार स्थापन झाल्यानंतर राज्यात राष्ट्रवादी विरुद्ध राज्यपाल असा संघर्ष निर्माण झाला होता. या पार्श्वभूमीवर शरद पवार यांनी नरेंद्र मोदी यांच्यासोबतच्या चर्चेवेळी मांडलेला राज्यपालांच्या हस्तक्षेपाचा मुद्दा चर्चेचा विषय ठरत आहे.

दरम्यान, आज पंतप्रधान नरेंद्र मोदी यांनी आज सर्वपक्षीय नेत्यांशी चर्चा केली. या चर्चेनंतर शरद पवार यांनी आपली प्रतिक्रिया दिली असून पंतप्रधान मोदी यांच्यासोबत नेमक्या कोणत्या गोष्टींवर चर्चा झाली आणि त्यावेळी काय मागण्या करण्यात आल्या, याबद्दल भाष्य केलं आहे.

'आज माननीय प्रधानमंत्री नरेंद्र मोदीजी यांच्यासोबत व्हिडिओ कॉन्फरन्सिंगद्वारे जागतिक महामारी #COVID_19 च्या पार्श्वभूमीवर चर्चा झाली. प्रामुख्याने काही गोष्टी माननीय पंतप्रधान महोदयांच्या निदर्शनास आणल्या,' असं शरद पवार म्हणाले.

सर्वपक्षीय बैठकीत पवारांनी कोणत्या मुद्द्यांकडे पंतप्रधानांचं लक्ष वेधलं?

- covid-19 ही जागतिक महामारी दीर्घकालीन लढायची आहे. याचे परिणाम जागतिक आणि भारताच्या अर्थव्यवस्थेवर होऊ शकतात. यादृष्टीने उचित पावले उचलण्याची आवश्यकता राहील. एकंदरीत आर्थिक व्यवस्थेचे पुनरुत्थान करण्याच्या दृष्टीने केंद्र सरकारने आतापासूनच विचार सुरू करावा.

- covid-19 मुळे शेती, उद्योग-व्यवसाय क्षेत्र अडचणीत आलेले आहे. शेतांमध्ये रब्बीचे पीक तयार आहे. परंतु फळं, फुलं, भाजीपाला यांची साठवणूक-विक्री या प्रत्येक बाबतीत अडचणी निर्माण झाल्यामुळे शेतीमालाचे मोठ्या प्रमाणावर नुकसान झाले आहे. शेतकरी वर्ग व शेतीवर अवलंबून असणाऱ्या घटकांना तातडीने दिलासा देण्याच्या दृष्टीने केंद्र सरकारने पावले उचलावीत.

- केंद्र सरकारने राज्य सरकारचे उत्पन्न कसे वाढेल वाढेल याकडे देखील लक्ष पुरवावे. जीएसटी करता राज्यांचा वाटा अद्याप राज्याला मिळालेला नाही. अशा राज्यांकडे तो तातडीने वर्ग व्हावा.

- Covid-19 च्या महामारीनंतर आर्थिक संकटे ओढवल्यानंतर काही कडक उपाययोजना कराव्या लागतील. त्यादृष्टीने नॉन-प्लॅन एक्‍सपेंडिचर म्हणजे नियोजनबाह्य खर्चावर कात्री लावावी लागेल. केंद्र शासनाचा विचार नवीन संसद भवन बांधण्याचा आहे. त्याची आवश्यकता तपासून प्रसंगी ते लांबणीवर टाकता येईल का, याचाही विचार व्हावा.

- स्थलांतरितांचा मोठा प्रश्न निर्माण झाला आहे. रोजगार बंद असल्यामुळे बरेचसे लोक जागोजागी अडकून पडले आहेत. अशा लोकांसाठी स्वयंसेवी संस्था आणि सरकार अन्नपाणी, तात्पुरता निवारा याबाबतीत लक्ष पुरवत आहे. परंतु केंद्र सरकारने अशा स्वयंसेवी संस्थांना देखील हातभार लावावा.

- ज्याच्याकडे आधार कार्ड अथवा रेशन कार्ड नसेल अशा व्यक्तींपर्यंत सुद्धा अन्न पोहोचले पाहिजे. ह्या देशात अन्नसुरक्षा कायदा अंमलात आला असल्याने कोणीही उपाशी राहू नये याची काळजी केंद्र सरकारने घ्यावी.

हेही वाचा- Coronavirus : केंद्रीय मंत्र्याचं अख्खं कुटुंब शिवतंय कोरोना योद्ध्यांसाठी सुरक्षा मास्क

- देशात संपूर्ण देशात लॉक डाऊन असल्यामुळे बरच समस्या देखील निर्माण झाल्या आहेत. परंतु महामारीचा सामना करणे अपरिहार्य असल्याने त्याबाबतीत राज्यनिहाय विचार व्हावा. आरोग्याशी तडजोड न करता, लोकांच्या जीविताशी तडजोड न करता काही भागात लॉक डाऊन शिथिल करण्याबाबत विचार करता येईल का हेही पाहावे.

- Covid-19 चे गांभीर्य पाहता बहुतांशी लोकांनी सहकार्य केलेले आहे. मागे दिल्लीतील निजामुद्दीन येथील गर्दीमुळे रोगाच्या प्रसाराबाबत चिंता निर्माण झाली. पण आता जे झाले ते मागे ठेवून रोगप्रसार कसा रोखता येईल यावर लक्ष केंद्रित करावयास हवे. कोणत्याही समाजाला दोष देणे किंवा प्रसाराचा ठपका ठेवणे हे बरोबर नाही.

- समाजातील काही घटक, मीडिया आणि सोशल मीडियाच्या माध्यमातून ह्या आपत्तीच्या परिस्थितीमध्ये जातीयतेचा रंग देणे, दोन समाजांमध्ये भेदभाव व द्वेषाची भावना पसरवणे हा प्रकार होत असेल तर अशा शक्तींचा वेळीच बंदोबस्त करावा. मीडियाला देखील विनंती आहे एखादी गोष्ट पुनःपुन्हा दाखवून समाजामध्ये क्लेश निर्माण होणार नाही याची त्यांनी काळजी घ्यावी.

संपादन- अक्षय शितोळे

बातम्यांच्या अपडेटसाठी लाईक करा आमच्या फेसबुक पेजला आणि टि्वटरवर फाॅलो करा

First Published: Apr 8, 2020 05:02 PM IST

ताज्या बातम्या

corona virus btn
corona virus btn
Loading