ट्रकला ओव्हरटेक करून स्कुटी पुढे काढली, पुढे जे घडलं..; अंगावर शहारे आणणारा VIDEO

मुजीब शेख, प्रतिनिधी

नांदेड, 22 जानेवारी : नांदेडमध्ये रस्त्याचे काम सुरू असताना स्कुटी स्लिप झाल्यामुळे ट्रकखाली येऊन महाविद्यालयीन तरुणीचा मृत्यू झाल्याची घटना घडली आहे. या अपघाताची घटना सीसीटीव्हीत कैद झाली.

नांदेड शहरातील मालेगाव रस्त्यावरची ही घटना आहे. पासदगाव येथे राहणारी 21 वर्षीय निकिता जाधव ही BCA च्या दुसऱ्या वर्षात शिकायला होती. तिच्या मैत्रिणीसह स्कुटीवरून महाविद्यालयात जात होती. महामार्गावर ट्रकला ओव्हरटेक करून पुढे जात असताना अचानक खड्यामुळे स्कुटी स्लिप झाली. स्कुटी स्लिप झाल्यानंतर दोन्ही तरुणी रस्त्यावर फेकल्या गेल्यात. तेवढ्यात पाठीमागून भरधाव वेगात येणाऱ्या ट्रकखाली निकिता सापडली गेली. ट्रकच्या चाकाखाली आल्यामुळे निकिताचा जागीच मृत्यू झाला.

नांदेडमध्ये खराब रस्त्यामुळे स्कुटी स्लिप झाली आणि तरुणी ट्रकखाली सापडली #VIDEO pic.twitter.com/oJZyh8d78N

— News18Lokmat (@News18lokmat) January 22, 2020

रस्त्याचे काम सुरू असल्याने रस्ता खालीवर होता. त्यामुळे नेमका अंदाज न आल्यामुळे स्कुटी स्लिप झाली. निकिताच्या अपघाती मृत्यूनंतर पासदगावमध्ये हळहळ व्यक्त करण्यात येत आहे.

बीडमध्ये राष्ट्रवादीच्या कार्यकर्त्यांची सरपंचाला बेदम मारहाण

बीडमध्ये राष्ट्रवादीच्या कार्यकर्त्याची गुंडगिरी पाहण्यास मिळाली आहे. सामाजिक न्याय मंत्री धनंजय मुंडे यांच्या कार्यकर्त्याने सरपंच पांडुरंग यांना बेदम मारहाण केली. या मारहाणीचा व्हिडिओ व्हायरल झाला आहे.

पाटोदा रोहतवाडी गावचे सरपंच पांडुरंग नागरगौजे यांना राष्ट्रवादीच्या कार्यकर्त्यांनी बेदम मारहाण केली आहे. भाजपचे काम का करतो, असा जाब विचारून राष्ट्रवादीच्या कार्यकर्त्यांनी खुर्ची आणि लाथा बुक्क्यांनी बेदम मारहाण केली. मारहाण करणाऱ्या कार्यकर्ते हे धनंजय मुंडे यांचं समर्थक असल्याचा आरोप पांडुरंग नागरगौजे यांनी केला आहे.

बीडमध्ये राष्ट्रवादीच्या कार्यकर्त्यांनी केली सरपंचाला बेदम मारहाण pic.twitter.com/OlzX1wEA5W

— News18Lokmat (@News18lokmat) January 22, 2020

धनंजय मुंडे यांच्याबद्दल चुकीची पोस्ट टाकली होती म्हणून मारहाण करण्यात आली असा दावाही या कार्यकर्त्यांनी फेसबुक पोस्ट टाकून केला. तसंच फेसबुकवर पोस्ट टाकून सरपंच पांडुरंग नागरगौजे यांना धमकीही देण्यात आली. 'धनंजय मुंडे यांच्याबद्दल बोलायची लायकी नाही. लायकीनुसार बोलं नाहीतर थेट 302 करण्याची धमकी देण्यात आली.