मनसेत नव्या बदलाची चर्चा सुरू असतानाच पक्षाकडून मिळाले संकेत, झेंडा हटवला

मनसेत नव्या बदलाची चर्चा सुरू असतानाच पक्षाकडून मिळाले संकेत, झेंडा हटवला

मनसेच्या झेंडाबदलाच्या चर्चेने आणखीनच वेग पकडला आहे.

  • Share this:

मुंबई, 20 जानेवारी : राज ठाकरे यांची महाराष्ट्र नवनिर्माण सेना लवकरच झेंडा बदलणार असल्याची जोरदार चर्चा सुरू आहे. अशातच आता मनसेच्या अधिकृत फेसबुक पेजवरुन पक्षाचा जुना झेंडा गायब झाला आहे. चार रंगाच्या झेंड्यावर रेल्वे इंजिनचे चिन्ह होते. मात्र आता फक्त रेल्वे इंजिनच ठेवण्यात आले आहे. त्यामुळे मनसेच्या झेंडाबदलाच्या चर्चेने आणखीनच वेग पकडला आहे.

मनसेला आलेली मरगळ झटकण्यासाठी आणि पक्ष संघटन पुन्हा एकदा मजबूत करण्यासाठी राज ठाकरे यांनी पक्षाचं महाअधिवेशन बोलावलं आहे. या अधिवेशनात राज ठाकरे अनेक मोठ्या घोषणा करण्याची शक्यता आहे. याच अधिवेशनात मनसेच्या नव्या झेंड्याचं लॉन्चिंग होण्याची शक्यता आहे. त्यामुळे झेंडा बदलत मनसे कात टाकणार का, हे पाहणं महत्त्वाचं ठरणार आहे.

कसा असेल मनसेचा नवा झेंडा?

मनसेचा चौरंगी झेंडा आता बदलणार आहे. आत्तापर्यंत मनसेच्या अजेंड्यावर मराठीच्या मुद्या अग्रभागी होता. आता त्याचसोबतच मनसे हिंदुत्वाचा मुद्दाही आक्रमकपणे लावू धरणार असल्याची माहिती सूत्रांनी दिली आहे. येत्या 23 जानेवारीला मनसेचं महाअधिवेशन मुंबईत होत असून त्यात राज ठाकरे पक्षाचं नवं धोरण जाहीर करणार आहेत. मनसेच्या राजकीय वाटचालीत हा निर्णय सर्वात महत्त्वाचा ठरणार असून मनसेला हा बदल यश मिळवून देणार का याकडे सगळ्यांचं लक्ष असणार आहे.

कमिशन मागणाऱ्या आमदार, खासदारांचं नाव उघड करा, राऊतांचे गडकरींना चॅलेंज

राज्यात बदलती राजकीय परिस्थिती लक्षात घेऊन मनसेचे अध्यक्ष राज ठाकरे नवी खेळी खेळण्याच्या तयारीत आहे. शिवसेनेने भाजपशी काडीमोड घेऊन काँग्रेस आणि राष्ट्रवादीसोबत जात राज्यात सरकार स्थापन केलं. काँग्रेससोबत गेल्याने शिवसेनाला आपली कडवी भूमिका थोडी मवाळ करावी लागली होती. त्यामुळे शिवसेनेचा कट्टर हिंदुत्ववादी मतदार आपल्याकडे खेचण्यासाठी मनसे नवी भूमिका स्वीकारणार असल्याची चर्चा आहे. दरम्यान मनसेच्या या नव्या भगवेकरणावर पुण्याच्या शिवसैनिकांनी चक्क स्वागत केलंय. काहीनी तर चक्क मनसेला सेनेत विलीन करण्याचा सल्ला दिला. पण हे सांगतानाच शिवसेनेचं हिंदुत्व अद्यापही कडवटच असल्याचं सांगायला ते विसरले नाहीत.

23 जानेवारीला बाळासाहेब ठाकरे यांची जयंती आहे. यादिवशी मनसेचं महाअधिवेशन पार पडणार आहे. या अधिवेशनात राज ठाकरे पक्षाला नवी दिशा देण्यावर कार्यकर्त्यांना उभारी देणार आहे. याच दिवशी आता राज ठाकरे मराठी अस्मितेसोबतच हिंदुत्वाचीही मोट बांधणार आहेत.

काँग्रेस-राष्ट्रवादीसोबत गेल्याने शिवसेनेने हिंदुत्वाबाबात मवाळ भूमिका घेतली असल्याची चर्चा आहे. ती निर्माण झालेली पोकळी भरून काढण्यासाठी मनसे आता नवी भूमिका स्वीकारणार असल्याची चर्चा असून राज्याच्या राजकारणात नवं वादळ निर्माण होण्याची शक्यता आहे. राज ठाकरेंच्या तुफान भाषणांमुळे मनसे सुवर्णकाळ सुरू झाला. पण 2013 नंतर मात्र मनसेचा पडता काळ सुरू झाला. यानंतर प्रत्येक कार्यक्रमांमधून राज ठाकरे कार्यकर्त्यांमध्ये जोश निर्माण करत राहिले पण त्यांची मतांची झोळी रिकामी झाली. अखेर आता पक्षाला पुन्हा उभं करण्यासाठी मसने हिंदुत्वाचीही मोट बांधणार आहे.

First published: January 20, 2020, 4:33 PM IST

ताज्या बातम्या