महाड इमारत दुर्घटना : 18 तासांनंतर 6 वर्षांच्या मुलानं केली मृत्यूवर मात, पाहा VIDEO

महाड, 25 ऑगस्ट : काळा आला होता पण वेळ आली नव्हती...रायगड जिल्ह्यातील महाड इमारत दुर्घटनेत अद्यापही NDRF कडून बचावकार्य सुरू आहे. या ढिगाऱ्याखालून 18 तासांनंतर सहा वर्षाच्या मुलाला बाहेर काढण्यात यश आलं आहे. या चिमुकल्या मुलाला ढिगाऱ्याखालून सुरक्षितपणे बाहेर काढण्यात NDRFच्या जवानांना यश आलं आहे.

सोमवारी संध्याकाळी 6.30 च्या सुमारास महाडमधील तारिक गार्डन नावाची 5 मजली इमारत कोसळली. त्यानंतर पोलीस आणि NDRF टीमकडून बचावकार्य सुरू आहे. सकाळी एक मृतदेह बाहेर काढण्यात आला होता आता एका मुलाला सुखरूप वाचवण्यात यश आलं आहे.

या दुर्घटनेप्रकरणी 5 जणांवर गुन्हा दाखल करण्यात आला आहे. यात बिल्डराचा समावेश आहे. या इमारतीचे बांधकाम करणाऱ्या बिल्डरावर गुन्हा दाखल करण्यात आला आहे. त्याच्यासोबत तत्कालीन मुख्याधिकारी, वास्तुविशारद, नगरपालिका इंजिनिअर आणि Rcc कन्सल्टन्स अशा पाच जणांवर गुन्हे दाखल केले आहे.

#Mahad @News18lokmat pic.twitter.com/5THaMY6tJS

— Manoj Khandekar (@manojkhandekar) August 25, 2020

हे वाचा-महाडमध्ये इमारत दुर्घटनेबद्दल नवी माहिती, काही तासांआधीचा PHOTO आला समोर

मोहम्मद बागी असं या चिमुकल्याचं नाव आहे. हा मुलगा त्याची आई आणि भावंडांसह खोलीत बसला होता आणि अचानक काही कळायच्या आत इमारत कोसळली. ढिगाऱ्याखाली हा चिमुकला दबला गेला होता. NDRF आणि पोलिसांनी या 6 वर्षांच्या मुलाला सुखरुपपणे बाहेर काढलं आहे.

या इमारतीमध्ये 43 कुटुंब राहात होती त्यापैकी 18 कुटुंबातील लोक कोरोनामुळे गावी गेले होते. घटनास्थळी 19 तासांपासून पोलीस, एनडीआरएफच्या मदतीनं मलबा हटवण्याचं काम सुरू आहे. सोमवारी जेसीबीच्या मदतीनं 8 जणांना ढिगाऱ्याखालून काढलं असून सध्या रुग्णालयात त्यांच्यावर उपचार सुरू आहेत. या ढिगाऱ्याखाली 15 जण अडकल्याची भीती व्यक्त केली जात असून सध्या NDRF कडून त्यांचा शोध सुरू आहे.