Vasant More: "भले माझ्याकडे Audi, BMW आहेत पण त्यामध्ये बसण्यासाठी मला..." वडिलांच्या आठवणीत वसंत मोरे भावूक

पुणे, 27 मे : मनसेचे पुण्यातील (Pune MNS) डॅशिंग आणि फायरब्रँड नेते अशी ओळख असलेले वसंत मोरे (MNS leader Vasant More) गेल्या अनेक दिवसांपासून चर्चेत आहेत. वसंत मोरे यांनी सामान्यांच्यासाठी उचललेल्या पावलांची चर्चा होतच असते. त्यातच आता वसंत मोरे यांनी एक ट्विट केलं आहे. या ट्विटची सध्या चर्चा होत आहे. आपल्या वडिलांच्या आठवणीत वसंत मोरे यांनी भावूक होत हे ट्विट केलं आहे. वसंत मोरे यांनी आपल्या वडिलांची जुनी सायकल अद्याप जपून ठेवली आहे. याच सायकलचा फोटो ट्विटरवर पोस्ट करत वसंत मोरे यांनी ट्विट केलं आहे. आपल्या ट्विटमध्ये वसंत मोरे यांनी म्हटलं, "या सायकलच्या मागील कॅरिअरवर अनेक दिवस रात्री, अनेक वर्षे बसून फिरलोय. ही सायकल कमीत कमी 30 वर्षांपूर्वीची आहे. कुऱ्हाडही अजून तीच आहे. सगळी प्रॉपर्टी विकली तरी हिची सर येणार नाही. कारण जेव्हा गमावण्यासारखे जवळ काहीच नव्हते तेव्हा फक्त हीच होती."

भले आज माझ्याकडे Audi ,BMW, इनोव्हा , harley Davidson आहे पण त्यामध्ये बसण्यासाठी मला त्या सायकलवर घेऊन फिरणारा वाघासारखा माझा बाप आज नाही. म्हणून ही सायकल मी अजून जपून ठेवली आहे.

— Vasant More | वसंत मोरे (@vasantmore88) May 26, 2022

आपल्या पुढच्या ट्विटमध्ये त्यांनी म्हटलं, "भले आज माझ्याकडे Audi ,BMW, इनोव्हा , harley Davidson आहे पण त्यामध्ये बसण्यासाठी मला त्या सायकलवर घेऊन फिरणारा वाघासारखा माझा बाप आज नाही. म्हणून ही सायकल मी अजून जपून ठेवली आहे." मनसेतला अंतर्गत वाद पुन्हा चव्हाट्यावर, वसंत मोरे भडकले पुण्यात महाराष्ट्र नवनिर्माण सेनेतील अंतर्गत गटबाजी पुन्हा एकदा समोर आली आहे. 15 मे रोजीमहाराष्ट्र नवनिर्माण सेनेनं पुण्यात मेळावा आयोजित केला होता. पण कार्यक्रमाच्या पत्रिकेत मनसेचे पुण्यातील माजी शहराध्यक्ष वसंत मोरे यांच्या नावाचा उल्लेख नसल्याचं समोर आलं आहे. त्यामुळे पुन्हा एकदा पुण्यातील मनसेच्या पदाधिकाऱ्यांकडून पुन्हा एकदा वसंत मोरे यांना डावलल्याचा प्रकार समोर आला. यावर वसंत मोरे यांनीही प्रतिक्रिया देत नाराजी व्यक्त केली होती. वाचा : राज्यसभा उमेदवारीच्या संदर्भात संभाजीराजेंनी केली मोठी घोषणा वसंत मोरे यांनी तीव्र शब्दांत नाराजी व्यक्त करत त्यांनी हे प्रकरण मनसेच्या वरिष्ठ नेत्यांपर्यंत नेलं. रात्री उशीरा माझ्या हातात कार्यक्रम पत्रिका आली. या कार्यक्रम पत्रिकेत 11 जणांची कोअर कमिटी आहे पण प्रत्यक्षात 11 जणांची नावं आहेत, त्यामध्ये माझं नाव नाही. हा विषय मुद्दाम केला गेला आहे. अशा कार्यक्रमातून मला लांब ठेऊन राज साहेबांच्या मनात माझ्याविषयी राग निर्माण झाला पाहिजे म्हणून अशा गोष्टी केल्या जात आहेत, अशा शब्दांत वसंत मोरेंनी आपला राग व्यक्त केला.