पंकजा मुंडेंचा पक्षाकडूनच पराभव, भाजपच्या माजी नेत्याचा गंभीर आरोप

पंकजा मुंडेंचा पक्षाकडूनच पराभव, भाजपच्या माजी नेत्याचा गंभीर आरोप

प्रकाश शेंडगे यांनी पंकजा मुंडे यांच्या परळीतील पराभवाला अप्रत्यक्षपणे माजी मुख्यमंत्री देवेंद्र फडणवीस यांनाच जबाबदार धरल्याची चर्चा आहे.

  • Share this:

मुंबई, 3 डिसेंबर : 'भाजपने कायम ओबीसी नेत्यांचं खच्चीकरण केलं आहे. गोपीनाथ मुंडे यांना पक्षातून काढून टाकण्याचा ठराव भाजपने मांडला होता, तो आम्ही फेटाळून लावला होता,' असं म्हणत धनगर समाजातील नेते प्रकाश शेंडगे यांनी भाजपवर गंभीर आरोप केला आहे. गेल्या काही दिवसांपासून पंकजा मुंडे भाजपमध्ये नाराज असल्याची चर्चा रंगत होती. या पार्श्वभूमीवर भाजपचे माजी ओबीसी नेते असलेल्या प्रकाश शेंडगे यांच्या आरोपाची चर्चा होत आहे.

'पंकजा मुंडे भाजपच्या निशाण्यावर आहेत. गोपीनाथ मुंडे यांच्यावर भाजपने अन्याय केला. आता तेच पंकजा मुंडे यांच्याबाबतही होत आहे. पंकजा यांना भाजप नेत्यांनीच मतदारसंघात पराभूत केले. आण्णा डांगे, गोपीनाथ मुंडे , दौलत आहेर यांसारखे नेते भाजपने संपवले. पंकजा यांनी वेळीच योग्य निर्णय घ्यावा,' असा सल्लाही प्रकाश शेंडगे यांनी दिला आहे. त्यामुळे प्रकाश शेंडगे यांनी पंकजा मुंडे यांच्या परळीतील पराभवाला अप्रत्यक्षपणे माजी मुख्यमंत्री देवेंद्र फडणवीस यांनाच जबाबदार धरल्याची चर्चा आहे.

राजकीय भूकंपाचा संकेत देणारी पंकजा मुंडे यांची फेसबुक पोस्ट :

"नमस्कार मी पंकजा गोपीनाथ मुंडे...

निवडणुका झाल्या निवडणुकीचे निकाल ही लागले. निकालानंतर राजकीय घडामोडी, कोअर कमिटीच्या बैठका, पक्षाच्या बैठका, हे सर्व आपण सर्वजण पहात होता. पराभव झाल्यानंतर काही क्षणातच माध्यमांसमोर जाऊन मी तो स्वीकारला. आणि विनंती केली की कुणीही याची जबाबदारी कुणावरही टाकू नये. सर्व जवाबदारी माझी आहे.

दुसऱ्याच दिवशी पार्टीच्या कोअर कमिटीच्या बैठकीस मी हजरही झाले.

'आधी देश,नंतर पार्टी आणि शेवटी स्वत:' हे संस्कार आमच्यावर लहानपणापासून झालेले आहेत. जनतेप्रती आपल्या कर्तव्यापेक्षा मोठं काहीही नसतं असं मुंडेसाहेबांनी लहानपणापासून शिकवलेलं आहे. त्यांच्या शिकवणी नुसार त्यांच्या मृत्युनंतर अगदी तिसऱ्याच दिवशी मी कामाला लागले.

पाच वर्षे सत्तेच्या माध्यमातून तुमची सेवा केली. मला ही सेवेची संधी केवळ आणि केवळ तुमच्या विश्वासामुळे मिळाली आणि आज पराभवानंतर माझ्याहीपेक्षा व्यथित माझ्या लोकांनी मला इतके मेसेजेस केले, इतके फोन केले, इतके निरोप दिले. "ताई आम्हाला भेटायला वेळ द्या," .."ताई आम्हाला तुम्हाला बघून तरी जाऊ द्या "...किती संवेदना तुम्ही माझ्यासाठी व्यक्त केली .

मी तुम्हा सर्वांची खुप खुप आभारी आहे. मला याची पुर्ण जाणीव आहे की तुमचं प्रेम हे माझ्यावर आहे आणि तेच माझं कवचकुंडल आहे. मुंडेसाहेबांनी एका क्षणात मला राजकारणात आणलं. एका क्षणात ते आपल्यातून निघूनही गेले. पहील्यांदा मुंडेसाहेबांचा आदेश म्हणून मी राजकारणात आले आणि नंतर मुंडेसाहेबांच्या पश्चात जनते प्रती असलेल्या जवाबदारी म्हणुन राजकारणात राहीले. आज राजकारणामध्ये झालेले बदल, जबाबदारीत झालेले बदल या सगळ्या बदलत्या संदर्भांचा विचार करुन आपला सर्वांचा पुढचा प्रवास ठरवण्याची आवश्यकता आहे.

आपण मला वेळ मागत आहात.. मी आपल्याला वेळ देणार आहे...

आठ ते दहा दिवसांनंतर...हे आठ-दहा दिवस मला थोडासा स्वत:शी संवाद साधण्यासाठी वेळ हवाय. पुढे काय करायचं? कोणत्या मार्गाने जायचं? आपल्या लोकांना आपण काय देऊ शकतो? आपली शक्ती काय? लोकांची अपेक्षा काय? या सगळ्या गोष्टींचा सर्वांगाने विचार करुनच मी 12 डिसेंबर रोजी आपल्या समोर येणार आहे.

12 डिसेंबर,लोकनेते मुंडे साहेबांचा हा जन्मदिवस...त्या दिवशी बोलेन तुमच्याशी मनसोक्त...जसं तुम्हाला माझ्याशी बोलावं वाटतं, बघावं वाटतं.. तसं मलाही तुम्हाला बोलावं वाटतं. मी महाराष्ट्राच्या लोकांच्या विषयी बोलतेय ...तुमच्याशी संवाद ही उत्सुकता माझ्या मनात आहे..नाहीतरी कोणाशी बोलणार आहे मी? तुमच्याशिवाय माझं कोण आहे?

12 डिसेंबरला आपल्या गोपीनाथगडावर भेटू !!

येणार ना मग तुम्ही सर्व? मावळे येतील हे नक्की !!!!"

First published: December 3, 2019, 4:10 PM IST

ताज्या बातम्या

corona virus btn
corona virus btn
Loading