भरधाव खासगी बसने टेम्पोला दिली धडक, 1 प्रवाशाचा मृत्यू

आनिस शेख, प्रतिनिधी

मावळ, 11 जानेवारी : मुंबई-बंगळुरु महामार्गावर उदगीर (लातूर )वरून मुंबईकडे जाणाऱ्या वनिता ट्रॅव्हल्सच्या खाजगी बस आणि टेम्पोचा भीषण अपघात झाला आहे. या अपघातात 1 प्रवाशाचा मृत्यू झाला आहे. तर 9 जण जखमी झाले आहे.

मुंबई-बंगळुरू महामार्गावर पहाटे 4 वाजेच्या सुमारास ही घटना घडली. वनिता ट्रॅव्हल्सच्या खाजगी लातूरहुन मुंबईकडे जात होती. पहाटे चार वाजेच्या सुमारास किवळे गावाजवळ बस पोहोचली असता पुढे जाणाऱ्या मालवाहू टेम्पोला जोरदार धडक दिली. हा अपघात इतका भीषण होता की, यात बसच्या समोरील भागाचा चुराडा झाला.

या अपघातात बसमधील एकूण 49 प्रवाशांपैकी एका प्रवाशाचा मृत्यू झाला आहे तर 9 प्रवासी गंभीर जखमी झाले आहेत. अपघातात जखमी झालेल्या प्रवाशांना औंध येथील शासकीय रुग्णालय तसंच देहुरोड आधार हॉस्पिटल अशा दोन रुग्णालयात उपचाराकरिता दाखल करण्यात आले आहे.

अपघातानंतर महामार्ग पोलीस घटनास्थळी दाखल झाले असून अपघातग्रस्त वाहन महामार्गावरून बाजूला करण्यात आले आहेत. त्यामुळे महामार्गावर वाहतूक कोंडी झाली नाही.

पुण्यातील भुमकर पुलाजवळ विचित्र अपघात

दरम्यान, पुण्यातील भुमकर पुलाजवळ आज पहाटेच्या सुमारास विचित्र अपघाताची मालिका घडली आहे. महामार्गावर एकापाठोपाठ ट्रक आणि कंटेरनरला भीषण अपघात झाला आहे. या घटनेचा व्हिडीओ समोर आला आहे. या व्हिडीओमध्ये महामार्गाच्या बाजूला दोन कंटेनर उलटल्याचे दिसून येत आहे. तर पुढे काही अंतरावर एका ट्रकने धडक दिली आहे. यात ट्रकच्या समोरील भागाचा पार चुराडा झाला आहे.

घटनास्थळी पोलीस आणि अग्निशमन दलाचे जवान पोहोचले आहे. क्रेनच्या मदतीने अपघातग्रस्त वाहनं बाजूला केली जात आहे. या भीषण अपघातात 3 जणांचा मृत्यू झाल्याचा अंदाज वर्तवण्यात आला आहे. तर 5 ते 7 जण जखमी असल्याचे सांगण्यात आले आहे. जखमींना तातडीने नजिकच्या रुग्णालयात दाखल करण्यात आले आहे.