उस्मानाबादच्या साहित्य संमेलनात राजकीय नेते नसणार!

उस्मानाबादच्या साहित्य संमेलनात राजकीय नेते नसणार!

९३ वे अखिल भारतीय मराठी साहित्य संमेलन जानेवारीत उस्मानाबाद येथे होत आहे.

  • Share this:

सिद्धार्थ गोदाम, प्रतिनिधी

औरंगाबाद : 10 जानेवारी 2020 पासून फादर फ्रान्सिस दिब्रिटो यांच्या अध्यक्षतेखाली उस्मानाबाद येथे होत असलेल्या 93 व्या अखिल भारतीय मराठी साहित्य संमेलनाची कार्यक्रमपत्रिका शुक्रवारी  साहित्य महामंडळाचे अध्यक्ष प्राचार्य कौतिकराव ठाले पाटील आणि संमेलनाचे स्वागताध्यक्ष नितीन तावडे यांनी मराठवाडा साहित्य परिषदेत घेतलेल्या पत्रकार परिषदेत जाहीर केली. साहित्य संमेलनाचे उद्घाटन ज्येष्ठ कवी पद्मश्री ना. धों. महानोर हे करणार असून समारोप ज्येष्ठ कथा - कादंबरीकार प्राचार्य रा. रं. बोराडे यांच्या उपस्थितीत होणार आहे.

९३ वे अखिल भारतीय मराठी साहित्य संमेलन जानेवारीत उस्मानाबाद येथे होत आहे. 'यंदाच्या संमेलनाचे वैशिष्टय म्हणजे हे संमलेन अराजकीय व्यासपीठ असणारे संमेलन ठरणार आहे. याचे कारण म्हणजे ना उद्घाटन सोहळा ना समारोप या दोन्ही कार्यक्रमात व्यासपीठावर राजकीय व्यक्ती असणार नाही. जे कोणी राजकीय नेते येतील ते रसिक असतील किंवा लेखक कवी असतील. साहित्य संमेलनाचे निमंत्रण हे सर्वांना आहे. मराठी साहित्याचा आणि साहित्यिकांचा हा सोहळा आहे.' अशी माहिती शुक्रवारी साहित्य महामंडळाचे अध्यक्ष कौतिकराव ठाले पाटील यांनी माध्यमांशी बोलतांना दिली. येत्या १०, ११ आणि १२ जानेवारी २०२० असे तीन दिवसीय अखिल भारतीय मराठी साहित्य संमेलन उस्मानाबाद येथे होत आहे.

संमेलनात वाङ्मयीन व सामाजिक प्रश्नांवर पाच परिसंवाद, प्रतिभा रानडे यांची प्रकट मुलाखत, निमंत्रित कर्वीची दोन कविसंमेलने, कथाकथन, महात्मा ज्योतीराव फुले यांच्या शेतक-याचा आसूड' या ग्रंथावर अभ्यासकांची परिचर्चा तसंच आजच्या पाच लक्षवेधी कथाकारांशी अरविंद जगताप व राम जगताप यांचा प्रकट संवाद, बालसाहित्यिकांचा मुलांशी संवाद साधणारा ‘बालमेळावा', बालाजी सुतार यांच्या गावकथा' या नाटकाचा प्रयोग आणि दर्जेदार सांस्कृतिक कार्यक्रम असे भरगच्च कार्यक्रम आखले आहेत, असं ठाले पाटील म्हणाले.

याशिवाय ज्येष्ठ व श्रेष्ठ कथाकार भास्कर चंदनशिव, दिल्ली येथे चहा विकून चरितार्थ चालवणारे मूळ अमरावती जिल्ह्यातील मान्यवर मराठी भाषक हिंदी साहित्यिक लक्ष्मणराव (चहावाले) आणि श्रीरामपूरच्या शब्दालय प्रकाशना'च्या प्रकाशक सुमती लांडे यांचा त्यांनी आपापल्या क्षेत्रात केलेल्या लक्षणीय कामगिरीबद्दल संमेलनात जाहीर सत्कार करून त्यांचा गौरव करण्यात येणार आहे. मराठवाड्यातील कवींचे 'आमचे कवी : आमची कविता' असे एक स्वतंत्र कविसंमेलन आयोजित करण्यात आले आहे. संमेलन स्थळ मांडवासमोर रसिक - वाचकांसाठी भव्य ग्रंथप्रदर्शन आयोजित केले असून पुस्तके खरेदी - विक्रीची उत्तम सोय करण्यात आलेली आहे.

प्रदर्शनाच्या मध्यभागी पुस्तक प्रकाशनाची खास सोय करण्यात आली आहे. संमेलनात कार्यक्रमांसाठी एक भव्य मंडप उभारण्यात आला असून त्यात सात हजार रसिकांची बसण्याची सोय केली जाणार आहे. याशिवाय आणखी एक मध्यम आकाराचा आणि कवि कट्ट्यासाठी एक लहान आकाराचा अशा दोन मंडपांतही एकाच वेळी तीन कार्यक्रमांची व्यवस्था करण्यात आली आहे. संमेलनस्थळाला 'संत गोरोबा काका नगरी' असे नाव देण्यात असले असून कार्यक्रमांसाठी उभारलेल्या मंडपांना उस्मानाबाद जिल्ह्यातील सुपुत्र शाहीर अमर शेख, सेतुमाधवरराव पगडी आणि दत्तो आप्पाजी तुळजापूरकर अशी नावे देण्यात आलेली आहेत.

तरी, रसिकांनी संमेलनाला येण्याचे व कार्यक्रमांचा व पुस्तके खरेदीचा आनंद घेण्याचे आवाहन ठाले पाटील आणि संमेलनाचे स्वागताध्यक्ष नितीन तावडे यांनी मराठीप्रेमी व वाङ्मयप्रेमी रसिकांना केलं आहे. या संमेलनात पुस्तक स्टॉलसाठी 5 जानेवारीपर्यंत नोंदणी करायची आहे. त्यानंतर 8  जानेवारीला  सोडत काढण्यात येईल, असंही ठाले पाटील म्हणाले. या पत्रकार परिषदेला महामंडळाचे कार्यवाह डॉ. दादा गोरे, स्वागताध्यक्ष नितीन तावडे, कोषाध्यक्ष माधव इंगळे, बालाजी तांबे,डॉ. रामचंद्र काळूखे उपस्थित होते.

बातम्यांच्या अपडेटसाठी लाईक करा आमच्या फेसबुक पेजला आणि टि्वटरवर फाॅलो करा

Tags:
First Published: Dec 28, 2019 10:36 PM IST

ताज्या बातम्या