तरुणाने कोब्रा नागाचा केला अमानुष छळ, धक्कादायक प्रकाराचा VIDEO समोर

नाशिक, 6 मार्च : नेलकटरच्या सहाय्याने नागाचे दात काढत त्याचा अमानुषपणे छळ करणाऱ्या कथित सर्पमित्रास वनविभागाने अटक केली आहे. निफाड तालुक्यातील उगाव येथे तीन दिवसांपूर्वी नाना लोखंडे यांच्या घराजवळ कोब्रा जातीचा नाग निघाला होता. यावेळी एका कथित सर्पमित्राने हा छळ केल्याचं एका व्हिडिओमधून स्पष्ट होत आहे.

उगाव येथे एका घराशेजारी कोब्रा जातीचा नाग आढळल्यानंतर शिवाजी साबळे नावाच्या ईसमाने त्याला पकडले होते. मात्र त्यानंतर शिवाजी साबळेने त्या नागाचा छळ करण्यास सुरुवात केली होती. सुरुवातीला शिवाजीने नागाला काठीने मारहाण केली. विशेष म्हणजे एवढ्यावरच न थांबता नेलकटरच्या सहाय्याने त्याचे दात उपटत नागाला जखमी केले.

कोब्रा नागाचा केला अमानुष छळ, धक्कादायक प्रकाराचा VIDEO समोर pic.twitter.com/sv7pvArNW4

— News18Lokmat (@News18lokmat) March 6, 2020

काही स्थानिक नागरिकांनी हा व्हिडीओ आपल्या मोबाईलमध्ये चित्रित करत तो व्हॉट्सअ‍ॅपवर व्हायरल केला होता. हा व्हायरल व्हिडिओ वनविभागाच्या अधिकाऱ्यांपर्यंत पोहोचला. त्यानंतर या सर्व धक्कादायक प्रकाराची दखल घेत वनविभागाच्या अधिकाऱ्यानी शिवाजी साबळेचा शोध घेत खेडे गावातून त्याला अटक केली आहे.