'जागावाटपाटप फॉर्म्युला..' बावनकुळेंची 'त्या' विधानावरुन पलटी; म्हणाले, माझ्या विधानाचा विपर्यास

नागपूर, 18 मार्च : आगामी विधानसभा निवडणुकीत 240 जागा लढवण्याचा भाजपाचा विचार आहे, त्यामुळे तयारीला लागा, असं आवाहन भाजप प्रदेशाध्यक्ष बावनकुळे यांनी केलं होतं. मात्र, यानंतर शिवसेना शिंदे गट आक्रमक झाल्याने बावनकुळे यांनी आपल्या विधानावरुन पलटी मारली आहे. शिवसेना भाजप युती आगामी विधानसभा निवडणुकीत नक्की किती जागा लढवणार याचा फॉर्म्युला अजून ठरलेला नाही, असे स्पष्टीकरणच भाजप प्रदेशाध्यक्ष चंद्रशेखर बावनकुळे यांनी दिले आहे. नागपूरमध्ये ते माध्यमांशी बोलत होते.

 चंद्रशेखर बावनकुळे काय म्हटले होते?

बावनकुळे यांनी भाजपच्या एका खासगी कार्यक्रमात शिवसेना-भाजपमधील संभाव्या जागावाटपाचा फॉर्म्युला जाहीर केला होता. 2024 मध्ये भाजपचे 150 ते 170 आमदार 100 टक्के निवडून येतील. आपण 240 च्या आसपास सीट लढण्याच्या विचारात आहोत. एकनाथ शिंदे यांच्या गटाकडे 50 पेक्षा जास्त आमदारच नाहीत, असे बावनकुळे यांनी म्हटले. अवघ्या काही तासांमध्ये बावनकुळे यांच्या या वक्तव्याचा व्हिडिओ व्हायरल झाला.

भाजपा महाराष्ट्रात ४८ लोकसभा व २८८ विधानसभा मतदारसंघ युतीमध्ये लढणार आहे, त्यात एनडीएचे घटक पक्ष असणार आहेत. 1/2 pic.twitter.com/wOWXwUGDeq

— Chandrashekhar Bawankule (@cbawankule) March 18, 2023

बावनकुळे यांची सारवासरव

मी जे बोललो त्यातला केवळ अर्धाच भाग दाखवण्यात आला आहे. खरं तर शिवसेना आणि भाजप मिळून विधानसभेच्या 288 आणि लोकसभेच्या 48 जागा लढणार आहे. आम्ही एनडीएतील सर्व घटक पक्ष मिळून या जागा लढणार आहोत. विधानसभेची निवडणूक ही देवेंद्र फडणवीस आणि एकनाथ शिंदे यांच्या समन्वयानं तर पंतप्रधान नरेंद्र मोदी आणि गृहमंत्री अमित शाह यांच्या मार्गदर्शनाखाली लढवली जाईल.

वाचा - भाजपकडून ठाकरेंचा 'तो' फोटो ट्विट! अंधारे म्हणल्या, फडणवीसांसोबत मुख्यमंत्र्यांची चौकशी करा

जागा वाटपाची चर्चा झालीच नाही

राज्यातील विधानसभेच्या 288 जागा जिंकण्याची तयारी आम्ही सुरू केली आहे. आतापर्यंत राज्यात युतीला जेवढं बहुमत मिळालं नाही, तेवढं बहुमत आम्ही मिळवणार आहोत. आम्ही तशी तयारी सुरू केली आहे. त्यामुळे माझ्या बोलण्याचा विपर्यास करण्यात आला. तेवढीच क्लिप व्हायरल करण्यात आली. अजून कुठलाही जागा वाटपाचा फॉर्म्युला ठरलेला नाही. यासंदर्भात कुठलीही चर्चा सुरू झाली नसल्याचं स्पष्टीकरण चंद्रशेखर बावनकुळे यांनी दिलं आहे.

आम्ही काय मुर्ख आहोत का : संजय शिरसाट

शिवसेना आमदार संजय शिरसाट यावर प्रतिक्रिया देताना म्हणाले, "चंद्रशेखर बावनकुळे यांच्या स्टेटमेंटमध्ये दम नाही. त्यांना एवढे अधिकार कोणी दिले, हे माहिती नाही? अशा वक्तव्यामुळे युतीमध्ये वाद निर्माण होतो, याची जाणीव बावनकुळे यांना असायला पाहिजे. आम्ही काय मुर्ख आहोत का फक्त 48 जागा लढवायला? दोन्ही पक्षातील जागावाटपासाठी वरिष्ठ पातळीवर निर्णय घेतला जाईल, अशी तिखट प्रतिक्रिया शिरसाट यांनी दिली आहे.