Yashwant Jadhav IT Raid: यशवंत जाधव यांच्या घरी 24 तासांनंतरही आयकर विभागाची छापेमारी सुरूच

मुंबई, 26 फेब्रुवारी : शिवसेनेचे नेते आणि मुंबई महानगरपालिकेचे स्थायी समिती अध्यक्ष यशवंत जाधव (Yashwant Jadhav) यांच्या अडचणीत वाढ होताना दिसत आहे. कारण, 24 तास उलटल्यानंतरही आयकर विभागाच्या अधिकाऱ्यांकडून यशवंत जाधव यांच्या घरी चौकशी सुरूच आहे. यशवंत जाधव यांच्या घरी काल (25 फेब्रुवारी 2022) सकाळी साधारणत: सात वाजता आयकर विभागाने धाड टाकली आणि चौकशी सुरू केली. आयकर विभागाची ही चौकशी अद्यापही सुरू असल्याची माहिती समोर आली आहे. (Income Tax department raid at Yashwant Jadhav house continues from 24 hrs in Mumbai)

भाजपच्या नेत्यांकडून यशवंत जाधव यांच्यावर भ्रष्टाचार आणि आर्थिक गैरव्यवहार केल्याचा आरोप करण्यात आला होता. त्यानंतर 25 फेब्रुवारी 2022 रोजी सकाळी आयकर विभागाच्या अधिकाऱ्यांनी यशवंत जाधव यांच्या घरी धाड टाकली. गेल्या 24 तासांनंतर आताही आयकर विभागाची ही कारवाई सुरू आहे. आयकर विभागाच्या अधिकाऱ्यांना चौकशीत काही व्यवहारांबाबत ठोस पुरावे, माहिती मिळाली की नाही याबाबत अद्याप कुठलीही अधिकृत माहिती समोर आलेली नाहीये.

शिवसैनिक आक्रमक

यशवंत जाधव यांच्या घरी सुरू असलेल्या या आयकर धाडीदरम्यान शिवसैनिकही आक्रमक झाले आहेत. यशवंत जाधव यांना आयकर विभागाचे अधिकारी घरातून नेणार असल्याची माहिती पसरली आणि मग रात्रीच शिवसैनिकांनी त्यांच्या घराबाहेर गर्दी करण्यास सुरुवात केली. यशवंत जाधव यांच्या घराबाहेर शिवसैनिकांनी मोठी गर्दी केली होती. शिवसैनिकांचा आक्रमक पवित्रा पाहता पोलीस बंदोबस्त सुद्धा वाढवण्यात आला.

शिवसैनिकांना शांतता राखण्याचं महापौरांचं आवाहन

यशवंत जाधव यांच्या घरी आयकर विभागाने धाड टाकल्याचं वृत्त मिळातच काल (25 फेब्रुवारी) शिवसैनिकांनी त्यांच्या घराबाहेर मोठी गर्दी केली होती. यावेळी महापौर किशोरी पेडणेकर (BMC Mayor Kishori Pednekar) या सुद्धा घटनास्थळावर पोहोचल्या. मुंबईच्या महापौर किशोरी पेडणेकर यांनी थेट यशवंत जाधव यांच्या निवास्थानाखाली येऊन संतप्त शिवसैनिकांना शांत केलं तसेच कोणत्याही तपास यंत्रणांच्या चौकशीला आम्ही सामोरं जायला तयार आहोत. भाजपने सूडाचं राजकारण केलं तरी आम्ही घाबरणार नाही असं किशोरी पेडणेकर यांनी ठणकावून सांगितलं.

वाचा : "कारवाई इथेच थांबणार नाही, आणखी चौघांवर लवकरच कारवाई" - किरीट सोमय्या

महापौर किशोरी पेडणेकर म्हणाल्या, हे सर्व सुडबुद्धीने केलं जात आहे. करु दे... जे सत्य आहे ते लोकांच्या समोर येईल. तपास यंत्रणेला त्रास द्यायचं नसतं त्यामुळे त्यांना डिस्टर्ब करु नये. त्यांच काम त्यांना करु दे. मुंबई पोलिसांनाही त्रास देऊ नये. त्यामुळे शिवसैनिकांनी शांत रहावे आणि तपास यंत्रणेला काम करु द्या, हेच सांगण्यासाठी मी इथे आली आहे.

यशवंत जाधव यांच्यावर काय आहे आरोप?

यशवंत जाधव आणि त्यांच्या पत्नी आमदार यामिनी जाधव यांनी कोलकाता येथील शेल कंपन्यांमध्ये आर्थिक व्यवहार केल्याचं आयकर विभागाच्या यापूर्वीच्या तपासात समोर आलं असल्याची माहिती आहे. यशवंत जाधव आणि त्यांच्या कुटुंबीयांनी शेल कंपन्यांबरोबरच्या व्यवहारातून पैसे कमवल्याचा आरोप आहे. यामिनी जाधव यांनी प्रधान डीलर्स नावाच्या कंपनीकडून 1 कोटी रुपयांचं कर्ज घेतल्याचा निवडणूक प्रतिज्ञापत्रात उल्लेख, तपासात ही शेल कंपनी असल्याचं उघड झालं. यामिनी जाधव यांनी कर्ज घेतल्याचं दाखवलेलं आहे पण हा पैसा कर्जाचा नाही तर त्यांचाच असल्याचं आयकर विभागाचं म्हणणं आहे.

आयकर विभाग एका हवाला एजंटचा तपास करत असताना त्याच्या मार्फत 15 कोटी रूपये काही रोख रक्कम आणि चेक स्वरूपात जाधव कुटूंबियांकडे आल्याचे दिसून आले. या उत्पन्नाची माहिती ही जाधव कुटूंबियांनी लपवली आणि त्यावर कर चुकवला नाही असा आयकर विभागाला संशय आहे.