मोठी बातमी! आता प्रशासकीय यंत्रणेच ऑपरेशन, आरोग्य मंत्र्यांनी घेतली आक्रमक भूमिका

मोठी बातमी! आता प्रशासकीय यंत्रणेच ऑपरेशन, आरोग्य मंत्र्यांनी घेतली आक्रमक भूमिका

प्रशासकीय यंत्रणेत काही ठिकाणी मोठी ऑपरेशन्स करावी लागणार आहेत, ती करण्यासाठीच जळगाव दौरा केला आहे.

  • Share this:

जळगाव, 3 जून: कोरोना व्हायरसनं जळगाव जिल्ह्यात अक्षरश: थैमान घातलं आहे. राज्यातच नव्हे तर देशात जळगाव येथे मृत्यूत जास्त आहे. वेगाने पसरणारा कोरोनाचा संसर्ग आणि मृत्यूदर देखील आटोक्यात आणणे, हे दोन प्रमुख उद्देश आहेत. त्यासाठी आज जळगावात आलो असल्याचं आरोग्य मंत्री राजेश टोपे यांनी सांगितलं.

हेही वाचा...Nisarga Cyclone: रत्नागिरीच्या मिर्य बीचवर उसळल्या मोठ्या लाटा, पाहा VIDEO

प्रशासकीय यंत्रणेत काही ठिकाणी मोठी ऑपरेशन्स करावी लागणार आहेत, ती करण्यासाठीच जळगाव दौरा केला आहे. जिल्ह्यातील कोरोनाचा संसर्ग रोखण्यात निश्चितच आपल्याला यश येईल, असा विश्वासही राजेश टोपे यांनी व्यक्त केला.

जळगाव जिल्ह्यातील कोरोनाचा मृत्यूदर हा राज्यातील इतर जिल्ह्यांच्या तुलनेत सर्वाधिक आहे. हा मृत्यूदर रोखण्यासाठी जळगाव जिल्ह्यातील प्रशासकीय यंत्रणेत काही ठिकाणी मोठी ऑपरेशन्स करावी लागणार आहेत. तीच ऑपरेशन्स करायला मी जळगावात आलो आहे, असे आरोग्यमंत्री राजेश टोपे म्हणाले.

पहाटे 2 वाजताच खासगी रुग्णालयात धडकले आरोग्यमंत्री...

दरम्यान, कोरोनाच्या पार्श्वभूमीवर खासगी रुग्णालयातील 80 टक्के खाटा राज्य शासनाने ताब्यात घेतल्या आहेत. मात्र अद्यापही काही ठिकाणी रुग्णांना खासगी रुग्णालयांकडून अपेक्षित ते सहकार्य होत नसल्याच्या तक्रारी येत आहेत. त्याची दखल घेऊन आरोग्यमंत्री राजेश टोपे यांनी काल रात्री मुंबईतील खासगी रुग्णालयांना अचानक भेटी दिल्या. मंगळवारी पहाटे दोन वाजेपर्यंत आरोग्यमंत्री रुग्णालयातील खाटांच्या उपलब्धतेबाबत माहिती घेत होते.

रुग्णांना दिलेल्या खाटांची अचूक माहीती रुग्णालय प्रशासनाने जाहीर फलकावर द्यावी. राज्य शासनाच्या नियमांचे पालन केलेच पाहिजे, असा इशाराही त्यांनी यावेळी दिला. दरम्यान, या भेटीमध्ये चारही रुग्णालयांमध्ये काही बाबींची अपूर्णता आढळून आल्याने राज्य आरोग्य सेवा हमी सोसायटीचे मुख्य कार्यकारी अधिकारी डॉ. सुधाकर शिंदे यांनी या रुग्णालयांना कारणे दाखवा नोटीस बजावली आहे.

कोरोना तसेच कोरोना शिवाय अन्य आजारांच्या रुग्णांचा उपचाराअभावी मृत्यू होऊ नये यासाठी राज्य शासनाने मुंबईसह राज्यातील खासगी रुग्णालयांच्या 80 टक्के खाटा ताब्यात घेण्याचा निर्णय घेतला आहे. त्याचबरोबर महात्मा फुले जनआरोग्य योजनेच्या माध्यमातूनही रुग्णांना मोफत उपचाराचा निर्णय घेतला आहे. महाराष्ट्रने घेतलेला हा अभिनव निर्णय अन्य राज्यांनाही प्रेरणादायी ठरला आहे.

80 टक्के खाटा राखीव करूनही रुग्णांना खाटा नाकारण्याचे किंवा बेड फुल झाल्याचे कारण खासगी रुग्णालयांकडून दिले जाते. यासंदर्भात रुग्णांच्या तक्रारी येत असून त्याची दखल घेत काल रात्री दहाच्या सुमारास आरोग्यमंत्र्यांनी खासगी रुग्णालयांना भेट देण्याचे मिशन हाती घेतले. त्यांच्या सोबत राज्य आरोग्य सेवा हमी सोसायटीचे मुख्य कार्यकारी अधिकारी डॉ. सुधाकर शिंदे होते.

सुरूवातीला त्यांनी बॉम्बे हॉस्पिटलला भेट दिली. तिथे खाटांच्या उपलब्धतेबाबत जाहीर फलक नसल्याचे निदर्शनास आल्यानंतर त्यांनी नाराजी व्यक्त केली. रुग्णालयातील एकूण खाटा, 80 टक्केनुसार दिलेल्या खाटा, शिल्लक खाटा यांची माहिती त्यांनी घेतली. त्यानंतर आरोग्यमंत्र्यांनी जसलोक, हिंदुजा, लिलावती या रुग्णालयांनाही भेटी दिल्या.

हेही वाचा.. मुंबई, ठाणे, नाशिकसाठी पुढचे 4 तास महत्त्वाचे! या गोष्टी केल्यात का?

रात्री दहाच्या सुमारास सुरू झालेली ही मोहिम पहाटे दोन पर्यंत सुरू होती. रुग्णांना खाटा नाकारू नका. त्यांना वेळेवर उपचार द्या. शासनाला सहकार्य करा, अशा सूचना त्यांनी यावेळी दिल्या. काही रुग्णालयांमध्ये बेडच्या उपलब्धतेबाबत आणि दिलेल्या बेड बाबत माहिती दर्शविणारे फलक नव्हते, शासनाने उपाचारासाठी जे दर निश्चित केले आहेत ते दरपत्रक लावण्यात आलेले नव्हते. क्षमतेच्या 50 टक्केही खाटांचा वापर न करताही अनेक रुग्णांना प्रतिक्षा करावी लागत आहे अशी विविध बाबी या भेटी दरम्यान निदर्शनास आल्या.

First published: June 3, 2020, 4:03 PM IST

ताज्या बातम्या