पेणमध्ये पावसाचा भयानक प्रकोप, घरावर वीज कोसळली, संसार उद्ध्वस्त, सुदैवाने.....

प्रमोद पाटील, रायगड, 7 सप्टेंबर : राज्यात ठिकठिकाणी आज दुपारनंतर अचानक वातावरणात बदल झाला. राज्यातील काही भागांमध्ये पावसाने तर प्रचंड थैमान घातले. त्यामध्ये रायगड जिल्ह्यातील पेण शहराचादेखील समावेश होता. पेण शहरात आज रस्ते पाण्याखाली गेले होते. बाजारपेठेत पाणी शिरलं होतं. याशिवाय घरं आणि दुकानांमध्ये पाणी शिरलं होतं. निसर्गाचा जणू हा कोपच झाला की काय इतका भयानक पाऊस सुरु होता. हेही असे की थोडे म्हणून पेण तालुक्यातील एका घरावर आज संध्याकाळी वीज कोसळली. पण काळ आला होता पण वेळ नव्हती, असं म्हणतात ते खरं ठरलं. घरावर वीज कोसळल्याने घराचं मोठं नुकसान झालं. पण घरात असलेल्या नागरिकांना कोणत्याही प्रकारची इजा झाली.

पेण तालुक्यातील भाल गावात एका घरावर वीज पडली. या घटनेत घराचे मोठे नुकसान झाले. वीज पडली तेव्हा घरात माणसे होती. मात्र सुदैवाने कोणालाही दुखापत अथवा हानी झाली नाही. मात्र घराचे संपूर्ण छत तुटले. या दुर्घटनेत घराचं मोठं नुकसान झालं आहे. पेण तालुक्यात दुपारपासून पावसाने अक्षरशः थैमान घातलं आहे. अनेक ठिकाणी पाणी साचलं आहे. अनेक दुकानं, घरात पाणी शिरलं आहे. पावसासोबत विजांचा कडकडाट सुरूच आहे. तर पेण, पनवेल, उरण, कर्जत, खालापूर तालुक्यात वीज गायब झालीय. अजूनही वीज आली नाहीय. त्यामुळे नागरिकांना मोठा त्रास सहन करावा लागत आहे. चारही बाजूने तालुक्याचे जनजीवन पूर्णपणे विस्कळित झाले आहे.

(ही तर सुरुवात, उद्या आणखी धुवांधार, मुसळधार पावसाबद्दल हवामान विभागाकडून महत्त्वाची माहिती)

रायगड जिल्ह्यातील पेण तालुक्यात पावसाचा अक्षरश: हाहाकार उडालेला बघायला मिळाला. रावे, गडब, पेण शहर या ठिकाणचे रस्ते आणि बाजारपेठा पाण्याखाली गेल्या. अनेक ठिकाणी दुकाने आणि घरांमध्ये पाणी शिरले. त्यामुळे जनजीवन विस्कळीत झाले. मुसळधार पावसामुळे पार्किंगमध्ये असलेल्या गाड्या पाणीखाली गेल्या. तसेच पावसामुळे संपूर्ण परिसराचा वीज पुरवठा खंडीत झाला. पावसामुळे संपूर्ण शहरात काळोख पसरला आणि विजांच्या कडकडाटासह मुसळधार पाऊस पडला. पावसामुळे पेण बस स्थानक परिसरात गुडघाभर पाणी साचलं. पेणमधल्या पावसाची भयानक दृश्य समोर आली आहेत.

खरंतर पेणमध्ये आज सकाळी ऊन पडलं होतं. दुपारीदेखील कडाक्याचं ऊन बघायला मिळालं होतं. पण दुपारनंतर अचानक वातावरणात बदल झाला. वादळी वारे वाहू लागले. त्यानंतर विजांच्या कडकडाट आणि ढगांच्या गडगडाटासह मुसळधार पाऊस सुरु झाला. हा पाऊस अतिशय आक्राळविक्राळ रुप घेवून आला. मुसळधार पावसामुळे शहरातील बाजारपेठेत पाणी भरलं. अनेक वाहनं पाण्याखाली गेली. नाल्यांमध्ये पाण्याचा प्रवाह वाढला. त्यामुळे नागरिकांमध्ये भीतीचं वातावरण पसरलं. अतिशय भयानक असा हा पाऊस होता.

विशेष म्हणजे पेण शहरात सकाळपासून वीज पुरवठा सुरळीत सुरु नव्हता. दिवसभर विजेचा लपंडाव सुरु होता. पण मुसळधार पावसाने या विजेला जाण्यासाठी जणू काही कारण मिळालं आणि तेव्हापासून विजेचा पुरवठा खंडीत झाला आहे. त्यामुळे नागरीक दुहेरी संकटात सापडले आहेत.