मुश्रीफांच्या अडचणी वाढणार? KDCCच्या पाच कर्मचाऱ्यांना EDने घेतलं ताब्यात

कोल्हापूर, 02 फेब्रुवारी : कोल्हापूर जिल्हा मध्यवर्ती बँकेत बुधवारपासून ईडीने ठाण मांडलं आहे. आता या प्रकरणी ईडीने मोठी कारवाई करत पाच कर्मचाऱ्यांना ताब्यात घेतलं आहे. केडीसीसी बँकेसह ईडीने हसन मुश्रीफ य़ांच्या संताजी घोरपडे साखर कारख्यान्यावरही कारवाई केली. गेल्या ३० तासांपासून ईडीकडून कोल्हापूर जिल्हा मध्यवर्ती बँकेची चौकशी सुरू होती. ईडीने पाच कर्मचाऱ्यांना ताब्यात घेताना बँकेतून चार बॉक्स भरून कागदपत्रेही नेली आहेत. ईडीने पाच जणांना ताब्यात घेतल्यानंतर बँकेचे इतर कर्मचारी संतप्त झाले आहेत.  तर बँकेच्या मुख्य कार्यालयाच्या परिसरात पोलिसांचा मोठा फौजफाटा तैनात आहे.

कोल्हापूर जिल्हा मध्यवर्ती बँकेच्या पाच जणांना ईडीने ताब्यात घेतलंय यामध्ये मुख्य कार्यकारी अधिकारी डॉक्टर अशोक माने, आर जे पाटील,

आर जे पाटील, व्यवस्थपक ( CMA ) साखर कारखाना, अल्ताफ मुजावर उप व्यवस्थापक ( साखर कारखाना कर्ज वाटप विभाग ), सचिन डोंडकर, निरीक्षक ( साखर कारखाना कर्ज वाटप विभाग) यांचा समावेश आहे.

हेही वाचा : फिरायला गेलेलं अल्पवयीन प्रेमीयुगुल, घरी परतताना दुचाकीसह कोसळले विहिरीत अन्...

आमदार हसन मुश्रीफ यांच्यावर झालेल्या कथित आरोपांममध्ये ईडीच्या सूत्रांनी दिलेल्या माहितीनुसार मुश्रीफ आणि त्यांच्या निकटवर्तीयांनी 15 वर्षांपूर्वी बंद झालेल्या कंपनीच्या खात्यात 50 कोटी कॅश भरले होते. ते पैसे साखर कारखान्याच्या खात्यात वळवले होते. तसेच कोलकात्यातील काही शेल कंपन्यांचा वापर करुन काळा पैसा आपल्या खात्यात वळल्याचा आरोप ईडीने केला आहे.

या प्रकरणाची मागील सहा महिन्यांपासून आम्ही चौकशी करत होतो अशी माहिती ईडीच्या वरिष्ठ अधिकाऱ्यांनी दिली होती. काही कंपन्यांची चौकशी ईडी करत आहे. त्या कंपन्यांचे कनेक्शन हसन मुश्रीफ आणि त्यांच्या संबंधित असलेल्या साखर कारखान्यांशी जोडलं जात आहे. रजत प्रायव्हेट लिमिटेड, माऊंट कॅपिटल लिमिटेड या दोन्ही कंपन्या बंद पडल्या आहेत.