Home /News /maharashtra /

नक्षलवाद्यांशी लढणाऱ्या पोलिसांना दिली उमेद, योद्ध्यांसोबत गृहमंत्र्यांनी साजरी केली दिवाळी

नक्षलवाद्यांशी लढणाऱ्या पोलिसांना दिली उमेद, योद्ध्यांसोबत गृहमंत्र्यांनी साजरी केली दिवाळी

गृहमंत्री अनिल देशमुख यांनी पोलीस कर्मचारी आणि कुटुंबियांसोबत अतिदुर्गम पोलीस ठाण्यात दिवाळी साजरी करुन फराळाचा आनंद घेतला.

    गडचिरोली, 14 नोव्हेंबर : राज्यात पोलीस कर्मचाऱ्यांसाठी सर्वाधिक धोक्याची नोकरी माओवादप्रभावीत गडचिरोली जिल्ह्यात मानली जाते. अशा अतिसंवेदनशील जिल्ह्यात राज्याचे गृहमंत्री अनिल देशमुख त्यांच्या सौभाग्यवती आरती देशमुख यांना सोबत घेऊन राज्याच्या सीमेवरील शेवटचं पोलीस ठाणे असलेल्या पातगुडमला पोहोचले. तिथे त्यांनी पोलीस कर्मचारी आणि कुटुंबियांसोबत अतिदुर्गम पोलीस ठाण्यात दिवाळी साजरी करुन फराळाचा आनंद घेतला. नक्षलवादी हिंसाचाराच्या विरोधात लढणाऱ्या गडचिरोली जिल्ह्यातील अत्यंत दुर्गम भागाला दिवाळीनिमित्त सपत्नीक भेट देऊन गृह मंत्री अनिल देशमुख यांनी पोलीस जवानांची उमेद वाढविली. देशमुख यांनी शनिवारी लक्ष्माी पूजनाच्या दिवशी गडचिरोलीपासून तीनशे किलोमीटर अंतरावर असलेल्या पातागुडमला भेट देऊन जवानांसोबत दिवाळी साजरी केली. शनिवारी दुपारी अडीच वाजण्याच्या सुमारास अनिल देशमुख आणि त्यांच्या पत्नी आरतीताई हेलीकॉप्टरने पातागुडम येथे पोहोचले. या वेळी गडचिरोली परिक्षेत्राचे पोलीस उपमहानिरीक्षक संदीप पाटील, गडचिरोलीचे पोलीस अधीक्षक अंकित गोयल, अतिरिक्त पोलीस अधीक्षक मनीष कलवनिया, सिरोंचा विभागाचे प्रांत अधिकारी प्रशांत स्वामी उपस्थित होते. दिवाळीच्या निमित्ताने प्रथमच गृह मंत्री येत असल्याने पोलिसांमध्ये उत्साहाचे वातावरण होते. गृहमंत्र्यांनी येथील पोलीसांशी संवाद साधला. नक्षलवाद्यांशी लढताना शहीद झालेल्या पोलीसांच्या कुटुंबियांची आस्थेने चौकशी केली. या भागामध्ये दौंड आणि कोल्हापूर येथील राज्य राखीव पोलीस बलाच्या तुकड्या कार्यरत आहेत. त्यांचे गृह मंत्र्यांनी विशेष कौतुक केले. या वेळी बोलताना देशमुख म्हणाले, भावनेपेक्षा कर्तव्याला प्राधान्य देणाऱ्या दिवाळीचा आनंददायी सण कुटुंब व मित्रांसोबत साजरा करायला मिळत नाही. गडचिरोलीसारख्या दुर्गम भागात पोलीस घरापसून, आपल्या आई-वडलांपासून, भावंडांपासून, पत्नी-मुलाबाळापासून दूर असाल, याची मला जाणीव आहे. तेव्हा पोलीस दलाचा कुटुंबप्रमुख म्हणून मला मनापासून वाटलं की मी तुमच्यात यायला हवं. माझं पोलीस दल ड्युटीवर असताना मी माझ्या घरात, माझ्या पत्नी-मुलांसमवेत दिवाळी साजरा करत बसलो असतो तर माझ्या मनाला रुखरुख लागली असती. म्हणून ठरवलं की तुमच्याकडं यायचं आणि काही वेळ तरी तुमच्या सोबत घालवायचा. गडचिरोली पोलीस क्षेत्राचे उपमहानिरीक्षक संदीप पाटील म्हणाले की, या ठिकाणी कार्यरत असणाऱ्या पोलीस कर्मचाऱ्यांची राहण्याची व्यवस्था बराकमध्ये केली आहे. त्यामुळे त्यांना आपल्या कुटुंबियांसमवेत राहता येत नाही. गृहमंत्र्यांनी हा प्रश्न तातडीने सोडविण्याचे आश्वासन दिले. पोलिसांच्या इतर अडचणी समूजन घेत सरकार सदैव पोलीस दलाच्या पाठीशी असल्याची ग्वाही देशमुख यांनी दिली.
    Published by:Akshay Shitole
    First published:

    Tags: Anil deshmukh, Gadchiroli

    पुढील बातम्या