'बावनकुळे स्पष्ट बोलणारा माणूस..' एकनाथ खडसेंकडून भाजप नेत्याचं कौतुक; शिवसेनेला डिवचलं

जळगाव, 18 मार्च : आगामी महाराष्ट्र विधानसभा निवडणुकीआधीच भाजप-शिवसेना (शिंदे गट) यांच्यात वादाची ठिणगी पडली आहे. याला कारणीभूत ठरलंय भाजप प्रदेशाध्यक्ष चंद्रशेखर बावनकुळे यांचं एक विधान. आगामी विधानसभा निवडणुकीत 240 जागा लढवण्याचा भाजपचा विचार असल्याचं ते म्हणाले होते. यावर शिंदे गट आक्रमक झाला असून बावनकुळे यांना आम्ही महत्त्व देत नसल्याचं त्यांनी म्हटलं आहे. यादरम्यान, राष्ट्रवादी काँग्रेसचे नेते एकनाथ खडसे यांनी मात्र बावनकुळे यांचं कौतुक केलं आहे.

काय म्हणाले खडसे?

चंद्रशेखर बावनकुळे मनमोकळ्या मनाचा आणि स्पष्ट बोलणारा माणूस आहे. बावनकुळे यांच्या कधी ओठात एक आणि पोटात दुसरं असं नाही. कार्यकर्त्यांसमोर स्पष्टपणे त्यांनी त्यांची सत्य भूमिका मांडली. यावरुन असं दिसतंय की शिवसेना शिंदे गटाकडे भाजप दुर्लक्ष करत आहे. पुढच्या लोकसभेच्या निवडणुकांमध्ये शिंदे गटाच्या तोंडाला पाणी पुसण्याचा प्रकार भाजप करेल, असा टोला एकनाथ खडसे यांनी लगावला. 288 पैकी 48 जागा ह्या शिवसेनेच्या शिंदे गटाला आणि उरलेल्या जागा भाजपाला. शिंदे गटाकडे सध्या चाळीस 42 जागा आहे. त्या लढवायच्या आणि दहा-बारा जागा निवडून आणायच्या. बावनकुळेंनी मांडलेली भूमिका स्पष्ट आहे. शिंदे गट हा महाराष्ट्रात लहानसा गट आहे, असा थेट हल्ला खडसे यांनी केला आहे.

वाचा - अवकाळी पावसाने शेतीमाल मातीमोल! कृषी मंत्र्यांकडून 5 मिनिटांत नुकसानाची पाहणी

चंद्रशेखर बावनकुळे यांनी काय म्हटले होते?

बावनकुळे यांनी भाजपच्या एका खासगी कार्यक्रमात शिवसेना-भाजपमधील संभाव्या जागावाटपाचा फॉर्म्युला जाहीर केला होता. 2024 मध्ये भाजपचे 150 ते 170 आमदार 100 टक्के निवडून येतील. आपण 240 च्या आसपास सीट लढण्याच्या विचारात आहोत. एकनाथ शिंदे यांच्या गटाकडे 50 पेक्षा जास्त आमदारच नाहीत, असे बावनकुळे यांनी म्हटले. अवघ्या काही तासांमध्ये बावनकुळे यांच्या या वक्तव्याचा व्हिडिओ व्हायरल झाला.

बावनकुळे यांची सारवासरव

मी जे बोललो त्यातला केवळ अर्धाच भाग दाखवण्यात आला आहे. खरं तर शिवसेना आणि भाजप मिळून विधानसभेच्या 288 आणि लोकसभेच्या 48 जागा लढणार आहे. आम्ही एनडीएतील सर्व घटक पक्ष मिळून या जागा लढणार आहोत. विधानसभेची निवडणूक ही देवेंद्र फडणवीस आणि एकनाथ शिंदे यांच्या समन्वयानं तर पंतप्रधान नरेंद्र मोदी आणि गृहमंत्री अमित शाह यांच्या मार्गदर्शनाखाली लढवली जाईल.