महाराष्ट्रातील कोरोना स्थितीवरून पुन्हा चिंता, मात्र डॉ. तात्याराव लहाने यांच्याकडून दिलासादायक बातमी

मुंबई, 19 फेब्रुवारी : महाराष्ट्रात कोरोना रुग्णांची संख्या पुन्हा एकदा वाढू लागली आहे. त्यामुळे राज्यात कोरोना विषाणूची दुसरी लाट आली आहे की काय, अशी भीती व्यक्त केली जात आहे. मात्र राज्यातील प्रख्यात डॉक्टर तात्याराव लहाने यांनी याबाबत दिलासादायक माहिती दिली आहे.

'महाराष्ट्रात कोरोनाची दुसरी लाट नाही. संसर्गजन्य आजाराचा हवामानानुसार जो चढ उतार आहे त्याचे हे संकेत आहेत. रुग्णांची संख्या वाढली तरी मृत्यू दर कमी राहील. कोरोनाला हरवण्यासाठी लॉकडाऊन हा उपाय नाहीय हात धुणे, मास्क लावणे आणि अंतर ठेवणे हाच उपाय आहे. नवीन कुठलेही लक्षण दिसत नाही हा दिलासा आहे,' अशी प्रतिक्रिया तात्याराव लहाने यांनी व्यक्त केली आहे.

'राज्यात कोरोनाचा हा नवा स्ट्रेन नाही, हा जुनाच विषाणू आहे. लॅब आणि डॉक्टरांचा अनुभव यामुळे कोरोना आटोक्यात राहील,' असा अंदाजही डॉ. लहाने यांनी व्यक्त केला आहे.

आरोग्य विभागानेही दिली आहे गूड न्यूज

अमरावती, यवतमाळ, सातारा आणि पुणे अशा राज्यांमधील काही जिल्ह्यांमध्ये मागील आठवड्यापासून कोविड रुग्णांच्या दैनंदिन संख्येमध्ये वाढ होताना दिसत आहे. या वाढीची कारणे शोधण्याचा प्रयत्न करण्यात येत आहे. या भागातील करोना विषाणूच्या जनुकीय रचनेमध्ये काही बदल झालेला आहे का, या संदर्भातही पाहणी करण्यात येत आहे असे आरोग्य विभागाने स्पष्ट केलं आहे.

हेही वाचा - मुंबईत मोठा निर्णय: Home Quarantine बंद, कोरोना रुग्णांना संस्थात्मक विलगीकरण बंधनकारक

आतापर्यंत अमरावती,यवतमाळ, सातारा या भागातील प्रत्येकी चार नमुने पुणे येथील बी जे वैद्यकीय महाविद्यालयामध्ये तपासण्यात आले असून या नमुन्यांच्या तपासणी अहवालानुसार या जिल्ह्यांमधील विषाणूमध्ये ब्रिटन,दक्षिण आफ्रिका किंवा ब्राझील या देशांमध्ये आढळलेल्या नवीन विषाणू प्रकारासारखा कोणताही बदल दिसून आलेला नाही.

पुण्यातील 12 नमुने देखील या वैद्यकीय महाविद्यालयात तपासण्यात आले असून त्यामध्येही जनुकीय क्रमामध्ये कोणतेही बदल दिसून आलेले नाहीत.

या अनुषंगाने अधिक तपासणी सुरू असून अकोला, अमरावती आणि यवतमाळ या जिल्ह्यातील आणखी काही नमुने राष्ट्रीय विषाणू विज्ञान संस्था आणि राष्ट्रीय पेशी विज्ञान संस्था, पुणे या ठिकाणी जनुकीय तपासणी करता पाठवण्यात आले आहेत. या संदर्भातील सविस्तर अहवाल पुढील आठवड्यापर्यंत मिळण्याची शक्यता आहे.