वर्षा ते मातोश्री इमोशनल यूटर्न, मुंबईत भर पावसात शिवसैनिक, एकनाथ शिंदे टेन्शनमध्ये!

मुंबई, 22 जून : शिवसेनेमध्ये (Shivsena) एकनाथ शिंदे (Eknath Shinde) यांनी आमदारांना घेऊन केलेल्या बंडानंतर मुख्यमंत्री उद्धव ठाकरे (CM Uddhav Thackeray) यांनी भावनिक आवाहन केलं. फेसबुक लाईव्हच्या माध्यमातून मुख्यमंत्र्यांनी राज्यातल्या जनतेशी संवाद साधला. माझ्याच लोकांना मी मुख्यमंत्रीपदी नको असेल तर काय करायचं? गुजरातला जाऊन बोलायची काय गरज आहे. मुख्यमंत्री नको असं मला सांगावं मी राजीनामा देण्यास तयार आहे. ज्यांना मी नकोय त्यांनी समोर येऊन सांगावे, मी पद सोडायला तयार आहे, असं मुख्यमंत्री म्हणाले. मुख्यमंत्री उद्धव ठाकरे वर्षा बंगला सोडणार असल्याचं कळताच मुंबईतील शिवसैनिक मुख्यमंत्री उद्धव ठाकरेंच्या समर्थनात रस्त्यावर उतरले आहेत. मुंबईमध्ये पाऊस पडत असतानाही उद्धव ठाकरेंसाठी शिवसैनिक रस्त्यावर भगवा झेंडा घेऊन दिसत आहेत. एकीकडे मुंबईमध्ये शिवसैनिक आक्रमक झालेले असताना तिकडे गुवाहाटीमध्ये एकनाथ शिंदे यांचं टेन्शन वाढलं असण्याची शक्यता आहे. आपल्याकडे 40 आमदार असून लवकरच याचे 50 होतील, असा दावाही एकनाथ शिंदे यांनी केला आहे. काय म्हणाले उद्धव ठाकरे? -- हिंदुत्व हा शिवसेना श्वास. शिवसेना आणि हिंदुत्व हे एकमेकांमध्ये गुंफलेलं आहे. हिंदुत्वाबद्दल विधानसभेत बोलणारा मी पहिला मुख्यमंत्री. असं काय केलं की हिंदुत्वापासून दूर गेलो असं वाटलं? आधीही शिवसेना हिंदुत्त्ववादी आताही हिंदुत्ववादीच आहे. -सत्तेच्या अडीच वर्षात जे मिळालं ते बाळासाहेबांनीच दिलं -आपल्या माणसांना शोधावं लागणं ही कसली लोकशाही?