'फडणवीसांना कायम या पदावर बघायला आवडेल', भुजबळांची मनापासून इच्छा!

मुजीब शेख, प्रतिनिधी

नांदेड, 19 मार्च : राष्ट्रवादी काँग्रेसचे ज्येष्ठ नेते छगन भुजबळ यांच्या जाहीर मुलाखतीचा कार्यक्रम नांदेडमध्ये पार पडला. या कार्यक्रमात छगन भुजबळ यांनी सध्याचं राजकारण, शिवसेनेचा वाद, शिवसेना सोडण्याचं कारण तसंच देवेंद्र फडणवीस यांच्याबाबत स्पष्टपणे उत्तरं दिली.

फडणवीसांना कोणतं पद?

देवेंद्र फडणवीस यांना नेहमी विरोधी पक्षनेते म्हणून बघायला आवडेल ते विरोधी पक्षनेता म्हणून चांगले काम करतात, असा टोला छगन भुजबळ यांनी लगावला. देवेंद्र फडणवीस यांना मुख्यमंत्री म्हणून बघायला आवडेल की विरोधी पक्षनेता म्हणून असा प्रश्न भुजबळ यांना मुलाखती दरम्यान विचारण्यात आला होता. त्यावर भुजबळ यांनी ही प्रतिक्रिया व्यक्त केली.

उद्धव ठाकरे धैर्याने उभे

पक्षाचे नाव गेले, चिन्ह गेले तरी उद्धव ठाकरे धैर्याने उभे आहेत त्यांचे कौतुक केले पाहिजे अश्या शब्दात माजी मंत्री छगन भुजबळ यांनी उद्धव ठाकरेंची स्तुती केली. सर्वस्व गमावल्या नंतर एखादा व्यक्ती अंथरुणाला खिळला असता पण उद्धव ठाकरे हजारोंच्या गर्दी समोर बोललात ही सोपी गोष्ट नाही असेही भुजबळ म्हणाले.

म्हणून शिवसेना सोडली

मंडल आयोगाच्या विरोधात बाळासाहेब ठाकरे यांची भूमिका असल्यामुळे शिवसेना सोडावी लागली, असं वक्तव्य छगन भुजबळ यांनी केलं आहे. भुजबळ यांच्या नाशिक येथील फार्म हाऊसवर असताना बाळासाहेब ठाकरे यांनी पोटाला जात नसते म्हणत मंडल आयोगाला विरोध केला होता. त्याच दिवशी नाशिकमध्ये छगन भुजबळ यांच्या नेतृत्वात मंडळ आयोग नेमण्याच्या मागणीसाठी व्हीजेएनटी चा मोर्चा काढण्यात आला होता. ह्या दोन्ही बातम्या वर्तमान पत्रात आल्या. त्यानंतर शिवसेना सोडण्याचा निर्णय घेत काँग्रेसमध्ये प्रवेश केल्याचे भुजबळ म्हणाले.

मी जेलयात्री

मी जेलयात्रीसुद्धा आहे, माझ्यासोबत ही डिग्री देखील चिकटली आहे. अडीच वर्ष जेलमध्ये राहावं लागतं तेव्हा जेल काय असं हे कळतं. त्या काळात मला वर्तमानपत्र आणि पुस्तकांची साथ मिळाली, असं भुजबळ म्हणाले. अमृत महोत्सवी वर्षानिमित्त नांदेडमध्ये छगन भुजबळ यांची प्रकट मुलाखत घेण्यात आली त्यावेळी भुजबळ बोलत होते.