VIDEO:कोरोनाचा प्रादुर्भाव रोखण्यासाठी एकनाथ खडसेंनी स्वतः ट्रॅक्टर चालवून केली औषध फवारणी

मुक्ताईनगर, 31 मार्च: राज्यात कोरोना व्हायरसचा प्रादुर्भाव दिवसेंदिवस वाढत आहे. कोरोना व्हायरसचा फैलाव रोखण्यासाठी केंद्रासह राज्य सरकार वेगवेगळ्या उपाययोजना करत आहे. या पार्श्वभूमीवर स्थानिक नेतेही मागे नाहीत. माजी मंत्री एकनाथ खडसे यांनी स्वत: मुक्ताईनगर तालुक्यातील कोथळी येथे जंतुनाशक फवारणी केली. यासाठी एकनाथ खडसे यांनी स्वतः ट्रॅक्टर चालवत गावात औषध फवारणी केली.

हेही वाचा...निजामुद्दीन परिषदेतील 441 लोकांमध्ये Coronavirus ची लक्षणं; 2000 जण क्वारंटाइन

डॉक्टरला घरातच केलं क्वारंटाइन

दरम्यान, जळगाव शहरातील मेहरुण परिसरात कोरोनाबाधित रुग्ण आढळल्याचे दोन दिवसांपूर्वी समोर आलं होतं. जिल्हा रुग्णालयात तपासणीपूर्वी हा रुग्ण एका खासगी मोठ्या रुग्णालयात गेला होता. आता या डॉक्टरलाही प्रशासनातर्फे घरातच क्वारंटाइन करण्यात आले आहे.

एकनाथ खडसेंनी स्वतः ट्रॅक्टर चालवून केली औषध फवारणी LIVE VIDEO pic.twitter.com/gW4gKgGqDE

— News18Lokmat (@News18lokmat) March 31, 2020

संपूर्ण गावच केलं सील

जळगाव शहरातील मेहरूण परिसरात कोरोनाचा पॉझिटिव्ह रुग्ण आढळून आला आहे. या रुग्णावर कोरोनाच्या पॉझिटिव्ह रुग्णावर जामनेर तालुक्यातील नाचणखेडे येथील डॉक्टरांनी उपचार केले होते. त्यामुळे आरोग्य विभागाने रुग्णाच्या संपर्कातील त्याची जामनेर येथील बहीण व उपचार करणाऱ्या डॉक्टरला उपचारासाठी जळगाव जिल्हा रुग्णालयात दाखल केले आहे तर प्रशासनाने खबरदारी म्हणून नाचणखेडा गाव सील केले आहे.

हेही वाचा...कोरोनाच्या लढ्यासाठी केवळ महिन्याचा नाही, माझा संपूर्ण वर्षाचा पगार घ्या

दुसरीकडे, महाराष्ट्रात एका दिवसात 72 कोरोनाव्हायरसचे नवे रुग्ण दाखल झाले आहेत. ही एका दिवसातली आतापर्यंतची सर्वांत मोठी संख्या आहे. देशभरात कुठल्याही एका राज्यात एकदम एवढ्या संख्येने रुग्णांमध्ये वाढ झालेली नाही. आता राज्यात कोरोना पॉझिटिव्ह रुग्णांचा आकडा 302 झाला आहे. आजचा दिवस राज्यासाठी धक्कादायक ठरला. संपूर्ण राज्य लॉकडाउन असतानाही एकदम 72 ने रुग्णसंख्या वाढली. 230 वरून आकडा थेट 302 झाला आहे.

एकट्या मुंबई आणि परिसरात (MMR)67 रुग्ण वाढले आहेत. ही एका दिवसातली आतापर्यंतची सर्वाधिक वाढ आहे. यातले खुद्द मुंबईतले 59 रुग्ण आहेत. तर पुणे, ठाणे, कल्याण डोंबिवली, नवी मुंबई, वाशी, विरार इथे प्रत्येकी 2 रुग्ण वाढले आहेत. अहमदनगर जिल्ह्यात 2 कोरोना पॉझिटिव्ह रुग्ण सापडले आहेत. त्यामुळे राज्याचा एकूण आकडा 72 ने वाढला आहे.