Maharashtra Weather Update : राज्यातून थंडी गायब होणार, पारा 35 अंशांच्या पुढे जाण्याची शक्यता, मुंबई, पुण्यात असा अंदाज

मुंबई, 03 फेब्रुवारी : जानेवारी महिन्यात राज्यात थंडीचा जोर मोठ्या प्रमाणात होता. याचबरोबर जानेवारी महिन्याच्या शेवटी राज्यात काही ठिकाणी पाऊस झाला होता. दरम्यान फेब्रुवारी महिन्यात कोकण आणि मध्य महाराष्ट्राच्या दक्षिण भागात किमान तापमान सरासरीपेक्षा अधिक राहण्याची शक्यता अधिक आहे. तर उर्वरित राज्यात किमान तापमान सरासरी इतके राहणार असल्याचे हवामान विभागाने स्पष्ट केले आहे.

हवामान विभागाने दिलेल्या माहितीनुसार फेब्रुवारी महिन्यातील किमान तापमान आणि पावसाचा अंदाज जाहीर केला. त्यानुसार देशाच्या बहुतांशी भागात किमान तापमान सरासरीपेक्षा कमी ते सरासरी राहण्याची शक्यता आहे. कोकण, दक्षिण मध्य महाराष्ट्र, दक्षिण गुजरात पश्‍चिम किनारपट्टीच्या उत्तर भागात किमान तापमानाचा पारा सरासरीच्या वर राहण्याची शक्यता अधिक असल्याचे हवामान विभागाने म्हटले आहे.

हे ही वाचा : दिल्ली, गुजरात, मुंबईपेक्षा पुण्याची हवा खराब, हे आजार वाढण्याचा धोका

दक्षिण कोकण, मध्य महाराष्ट्र आणि मराठवाड्याचा दक्षिण भाग, मध्य प्रदेशाचा पश्‍चिम भाग आणि दक्षिणेकडील राज्यात कमाल तापमान सरासरीपेक्षा कमी राहण्याची शक्यता हवामान विभागने अधिक आहे.मध्य महाराष्ट्रात बऱ्यापैकी अजून गारवा आहे. विदर्भातही नांदेड वगळता बाकी जिल्ह्यांमध्ये किमान आणि कमाल तापमान फार वाढण्याची शक्यता कमी असल्याचं IMD कडून अंदाज वर्तवण्यात आला आहे.

स्कायमेटने दिलेल्या माहितीनुसार, उत्तराखंडमध्ये आज पावसाची शक्यता आहे. तर तामिळनाडू आणि केरळच्या दक्षिण भागातही पावसाचा अंदाज वर्तवण्यात आला आहे. गिलगिट-बाल्टिस्तान, मुजफ्फराबाद, लडाख, जम्मू-काश्मीर आणि हिमाचल प्रदेशच्या काही भागात येत्या २४ तासांत हलका ते मध्यम पाऊस आणि बर्फवृष्टी होऊ शकते.

हे ही वाचा : अवकाळी पावसाने कांदा; केळी महाग होण्याची शक्यता, शेतीचे मोठे नुकसान

पंजाब, हरयाणा आणि पश्चिम राजस्थानच्या काही भागात रात्रीच्या किमान तापमानात किंचित वाढ होण्याची शक्यता आहे. हवामान खात्याने उत्तराखंडमधील चमोली, पिथौरागढ, रुद्रप्रयाग आणि उत्तरकाशी या चार जिल्ह्यांमध्ये तीन हजार मीटरपेक्षा जास्त उंचीवरील भागात हिमस्खलनाचा इशारा दिला आहे. त्यामुळे प्रशासन अलर्टवर आहे.