ऑफिस पाठीवर घेऊन तीन मित्रांनी केली मुंबई ते कन्याकुमारी सायकल वारी

मुंबई,22 जानेवारी : खरंतर रुटीन कामाचा कंटाळा आल्यावर दोन-चार दिवस सुट्टी (Holiday)घेऊन कुठेतरी फिरायला जाण्याचं(Trip)  स्वप्न प्रत्येकाचं असतं, पण अनेकदा आपल्याला हवी असते तेव्हा कामातून सुट्टी मिळत नाही. त्यामुळं फिरायला जाण्याचं स्वप्न मागं पडतं. सध्याच्या कोविड काळात (Covid Pandemic) तर फिरायला जाणं तसंच सार्वजनिक वाहतूक सेवेचा (Public Transport) वापर करणंही धोकादायक असल्यानं अनेकांचं फिरायला जाण्याचं स्वप्न अपूर्णच राहिलं आहे. मुंबईतील तीन मित्रांनी मात्र या सगळ्या समस्यांवर तोडगा काढत चक्क सायकलवरून(Cycle) कन्याकुमारी बघण्याचं आपलं स्वप्न प्रत्यक्षात आणलं आहे आणि तेही ऑफीसमधून सुट्टी न घेता.

बेकन जॉर्ज, ओल्विन जोसेफ आणि रतीश भालेराव अशी या तिघांची नावं असून, ते तिघंही मुंबईत नोकरी करतात. सध्या अनेक जण घरून काम करत आहेत, तसेच हे तिघेही घरून काम करत होते. ऑनलाइन काम करत असल्यानं बेकन याला ऑफीसचं काम सांभाळून, सुट्टी न घेता पर्यटनाला जाण्याची कल्पना सुचली. नोव्हेंबरमध्ये त्याला ही कल्पना सुचली, त्या वेळी एकट्यानेच लांबच्या सहलीला जाण्याची त्याची योजना होती; पण त्यानं त्याच्या मोहिमेला सुरुवात करण्याआधी दोन दिवस ऑल्विन आणि रतिश यांनीही त्याच्यासोबत येण्याची तयारी दाखवली आणि हे त्रिकुट मुंबईवरून कन्याकुमारीला सायकलवरून जाण्यासाठी सज्ज झालं, तेही त्यांचं ऑफीस त्यांच्या पाठीवर घेऊन.

बेकन याचा हा तिसरा लांब पल्ल्याचा प्रवास आहे. या तिघांनी एका महिन्यात महाराष्ट्र(Maharashtra) ते तामिळनाडू (Tamilnadu) या दोन राज्यांमधील 1687 किलोमीटरचे अंतर पार केलं. या काळात दररोज लॅपटॉपवरून ऑफीसचं काम करत सुट्टी न घेता त्यांनी हा प्रवास पूर्ण केला.

दररोज पहाटे चार वाजता ते सायकल चालवायला सुरुवात करत, साधारण अकरा वाजता ठरवलेल्या ठिकाणी भेटत. स्थानिक रेस्टॉरंटस, टपऱ्या, हॉटेल अशा ठिकाणी थांबून खाणंपिणं करून काम करत आणि मग संध्याकाळी पुढे जात असा आमचा दिनक्रम होता. दरम्यान, सायकलवर त्यांच्या लॅपटॉपचंही ओझं असल्यानं थोडा त्रास झाला, अशी माहिती बेकन यानं दिली. अशा काही अडचणींचा सामना करत हा प्रवास पूर्ण करणं आव्हानात्मक होतं, पण त्याचं सार्थक झालं. सायकलिंगमुळं (Cycling) स्वातंत्र्यही मिळालं आणि वेगळा रोमांचक अनुभवही घेता आला, असंही बेकन यानं सांगितलं.

हे देखील वाचा - माझ्या नाटकाचे प्रेक्षक वडिलांच्या टॅक्सीतून आले होते तेव्हा...' भरत जाधवने शेअर केली इमोशनल FB पोस्ट

दररोज साधारण 80 किलोमीटरचं अंतर ते पार करत. साप्ताहिक सुट्टीच्या दिवशी जास्त अंतर कापत, सुरुवातीला दोन दिवस हे रुटीन अवघड वाटतं होतं, नंतर मग त्याची सवय झाली, असं ओल्विन यानं सांगितलं.

या प्रवासात त्यांना अडचणीही आल्या. कोविड 19च्या निर्बंधामुळे अनेक ठिकाणी राहण्याची व्यवस्था होणं कठीण गेलं. याशिवाय फार मोठया अडचणी त्यांना आल्या नाहीत, त्यामुळं प्रत्येकी 25 हजार रुपये खर्चात त्यांची ही सहल पार पडली. या तिघांच्या कामाच्या ठिकाणच्या वरिष्ठांनीही त्यांच्या या साहसी प्रवासासाठी पाठिंबा दिला. अर्थातच कामावर याचा काहीही परिणाम होऊ न देण्याबाबत दक्षता घेण्याची सूचना त्यांनी दिली होतीच.

रतीशच्या मते, या प्रवासामुळे वेगळ्या जीवनशैलीचा अनुभव घेता आला. सायकल चालवण्यात त्यांचा बराच वेळ जात असला तरी आजूबाजूच्या गोष्टींचा आस्वाद घेण्याचा, नवीन प्रदेश, तिथली संस्कृती  या सगळ्याचा अनुभव त्यांना घेता आला. ही या सगळ्यातील सुंदर बाब आहे.