नव्या वर्षात रोहित शेट्टीने स्वीकारलं नवं चॅलेंज; या माध्यमातून प्रेक्षकांचं मनोरंजन करणार

मुंबई, 04 जानेवारी :अ‍ॅक्शन आणि कॉमेडीचा तडका असलेल्या सिनेमांची नाव घ्यायची झाली तर रोहित शेट्टीचे (Rohit Shetty) अनेक सिनेमा त्यात येतील. सिंबा, गोलमाल, चेन्नई एक्स्प्रेस, ऑल दी बेस्ट, सिंघम रिटर्नस् अशा अनेक चित्रपटातून रोहितने आपलं मनोरंजन केलं आहे. आता रोहित शेट्टीला नवं माध्यम खुणावत आहे. ते माध्यम आहे ओटीटीचं. रोहित शेट्टी लवकरच ओटीटी (Digital World) विश्वात पदार्पण करणार आहे. सुत्रांच्या माहितीनुसार, रोहित शेट्टी लवकरच 8 भागांची एक अ‍ॅक्शन, थ्रिलर वेब सीरिज (Web Series) बनवणार आहे. ही वेब सीरिज सत्य घटनेवर प्रेरीत असेल. या वेब सीरिजचं नाव अजून निश्चित झालेलं नाही. सध्या रोहित शेट्टी रणवीर सिंगसोबत एका सिनेमाचं काम करत आहे. हा सिनेमाचा शेक्सपिअरच्या 'द कॉमेडी ऑफ फिअर्स' या नाटकावरुन घेण्यात आला आहे. 'सर्कस' असं या सिनेमाचं नाव आहे.

View this post on Instagram

A post shared by Rohit Shetty (@itsrohitshetty)

हा चित्रपट विनोदी असेल. लॉकडाऊनमध्ये मिळालेल्या मोकळ्या वेळात रोहित शेट्टीने स्क्रिप्टवर काम केलं आहे. शेट्टीने रणवीर सिंगसोबत या चित्रपटाची कल्पना शेअर केली तेव्हापासून रणवीर सिंगदेखील या या चित्रपटासाठी खूप उत्साही आहे. मीडिया रिपोर्टनुसार रणवीर सिंग या चित्रपटात प्रथमच डबल रोल साकारणार आहे. रणवीर सिंग व्यतिरिक्त वरुण शर्मा, पूजा हेगडे आणि जॅकलिन फर्नांडिससुद्धा महत्त्वपूर्ण भूमिकेत असतील. सर्कस चित्रपटाचं काम पूर्ण झाल्यानंतर तो वेब सीरिजच्या तयारीला लागणार आहे. आता या नव्या चॅलेंजमध्ये तो किती यशस्वी होतो हे येणाऱ्या काळात समजेलच.