क्राईम पेट्रोल पाहून घेतली प्रेरणा, वेशांतर करुन मंदिरातच.. सीसीटीव्हीत धक्कादायक प्रकार कैद

मुंबई, 30 जानेवारी : टीव्ही मालिकेतून प्रेरणा घेत पुजार्‍याच्या वेशात जैन मंदिरात जाऊन पूजेच्या बहाण्याने मंदिरात चोरी करणाऱ्या चोरट्याला दिंडोशी पोलिसांनी अटक केली आहे. सोन्या-चांदीच्या ताट आणि प्रसादाची चोरी करणार्‍या अट्टल चोरट्याला बेड्या ठोकल्या. पोलिसांकडून मिळालेल्या माहितीनुसार, क्राईम पेट्रोल पाहून स्वत:ला वाचवण्यासाठी तो जैन समाजाचा वेश घेऊन, तोंडाला मास्क लावून आधी रेकी करत असे. जैन मंदिरात पूजा करून नंतर मंदिरात ठेवलेले सोने-चांदीची पूजा करून तो माल चोरून पळून जायचा आणि चोरीचा माल विकून मिळालेल्या पैशातून जुगार खेळायचा. भरत सुखराज दोशी, असे अटक करण्यात चोरट्याचे नाव आहे.

चोरट्याकडून 50 लाखांचा मुद्देमाल हस्तगत

दिंडोशी पोलिसांनी दिलेल्या माहितीनुसार, आरोपी दररोज तीन ते चार मंदिरात पूजेच्या बहाण्याने जात असे आणि संधी मिळेल तेव्हा तेथून वस्तू चोरून नेत असे. एका जैन मंदिरात चोरीचा प्रकार उघडकीस आल्यानंतर पुजाऱ्याने दिंडोशी पोलिसात तक्रार दिली होती. दिंडोशी पोलिसांना 23 जानेवारी रोजी जैन पुजारी धीरज लाल शाह यांची तक्रार प्राप्त झाली होती, ज्यात त्यांनी पूजेसाठी मंदिरात घेतलेले 160 ग्रॅम सोन्याचे ताट गायब झाल्याचे नमूद केले होते. पुजाऱ्याच्या तक्रारीनंतर पोलिसांनी गुन्हा दाखल करून चोरट्याचा शोध घेतला आणि त्याला अटक केली. अटक केलेल्या चोरट्याकडून चोरीची सोन्याची भांडी आणि काही वस्तू जप्त केल्या आहेत. हस्तगत करण्यात आलेल्या मुद्देमालाची एकूण किंमत सुमारे 5 लाख 30 हजार आहे.

वाचा - बायको हरवल्याची तक्रार द्यायला गेलेल्या सासर-माहेरचे सगळेच टाकले आत; धक्कादायक प्रकार उघड

मालाड येथील एका जैन मंदिरात लावण्यात आलेल्या सीसीटीव्हीमध्ये कैद झालेल्या या व्हिडीओमध्ये आरोपी जैन धर्माच्या वेशात मंदिरात पूजा करण्यासाठी आला. काही वेळ इकडे-तिकडे पाहिल्यानंतर आरोपीने तेथे उपस्थित असलेल्या सोन्याच्या पाट्या आणि प्लेट्स चोरून नेल्या. आरोपींनी धारण केलेल्या वेशामुळे पोलिसांना 93 हून अधिक सीसीटीव्ही फुटेज शोधावे लागले आणि घटनाक्रम समोर आला, असे अधिकाऱ्याने सांगितले. दिंडोशी पोलिसांकडे असे अनेक फुटेज या चोराचे समोर आले आहेत. जैन उपासकाचा वेश परिधान केलेला आरोपी आपल्या घरातून स्कूटरवर जात असे आणि चोरी केल्यानंतर त्याने असे मार्ग निवडले जेथे सीसीटीव्ही कॅमेरे बसवले नव्हते, असे दिंडोशी पोलीस ठाण्याचे पोलीस निरीक्षक धनाजी कावडे यांनी दिली आहे.