नातीचं होत नव्हतं दुसरं लग्न, प्रॉपर्टीमध्ये हक्क मागायचा नातू; भीतीने पणजोबांचं धक्कादायक कृत्य

दरम्यान, इंदूर येथील क्षिप्रा पोलीस ठाण्याच्या हद्दीतील कडवली येथील एका चार वर्षांच्या मुलाची हत्या झाल्याचे 7 एप्रिल 2023 रोजी समोर आलं होतं. यानंतर पोलिसांनी मुलाचा मृतदेह शवविच्छेदनासाठी पाठवला आणि प्रकरणाचा तपास सुरू केला. शवविच्छेदन अहवालात मुलाचा मृत्यू गुदमरल्याने झाल्याचं स्पष्ट झालं आहे. यानंतर पोलिसांनी दीड महिन्यांपर्यंत सतत 200 तासांहून जास्त काळ कुटुंबीयांची चौकशी केली. त्यानंतर या प्रकरणाचा खुलासा होऊ शकला. या लहान मुलाचा खून करणारा दुसरा कोणी नसून त्याचे पणजोबा असल्याचं निष्पन्न झालं. पोलिसांनी खुनी शोभारामकडे चौकशी केली असता, मुलाची आई नीतू चौधरी हिच्या दुसऱ्या लग्नात मूल अडसर ठरत असल्याचं त्याने सांगितलं. या मुलामुळे तिला ना अभ्यास करता येत होता ना तिचं लग्न होत होतं. या कारणामुळे पणजोबांनी त्याची हत्या केली. सध्या पोलिसांनी आरोपीला अटक करून संपूर्ण प्रकरणाचा कसून तपास सुरू केला आहे.

या प्रकरणाबाबत इंदूर ग्रामीणच्या एसपी हितिका वासल यांनी माहिती दिली. त्यांनी सांगितलं, ``24 वर्षांच्या नीतूचा विवाह देवासमधील सुतारखेडी येथील सुमित चौधरीशी झाला होता. श्रेयांशच्या जन्मानंतर सुमारे अडीच वर्षांनी सुमित आणि नीतू विभक्त झाले. तेव्हापासून ती तिच्या माहेरी राहत होती आणि पीएससीच्या तयारीत व्यस्त होती. नीतूचे आजोबा म्हणजेच श्रेयांशचे पणजोबा शोभाराम यांना वाटलं की नीतू श्रेयांशमुळे नीट अभ्यास करू शकत नाही. तसंच त्याच्यामुळे नीतूचं दुसरं लग्नही होत नाही. नीतू जेव्हा क्लासला जायची तेव्हा श्रेयांशला सांभाळण्याची जबाबदारी शोभारामवर होती. श्रेयांश मोठा झाल्यावर प्रॉपर्टीत हिस्सा मागेल, असंदेखील शोभारामला वाटत होतं. त्यामुळे आरोपीने रात्रीच्यावेळी चादरीची उशी तयार करून श्रेयांशचं तोंड दाबलं. यामुळे गुदमरून लहानग्या श्रेयांशचा मृत्यू झाला.`` पोलीस आता याप्रकरणाचा सखोल तपास करत आहेत.