मोठी बातमी! कोरोनातून बरे झाल्यानंतर केंद्रीय शिक्षणमंत्री एम्समध्ये दाखल, बारावीच्या परीक्षांबाबत आज होणार होती बैठक

नवी दिल्ली, 01 जून: केंद्रीय शिक्षणमंत्री डॉ. रमेश पोखरियाल निशंक (Union Education Minister Dr Ramesh Pokhriyal Nishank) यांना एम्स रुग्णालयात (AIIMS Hospital) दाखल करण्यात आलं आहे. कोव्हिडनंतर होणाऱ्या आरोग्या संदर्भातील तक्रारींमुळे (Post COVID-19 Complications) त्यांना एम्समध्ये दाखल करण्यात आलं आहे. आज सीबीएसई आणि आयसीएसई बोर्डाच्या बारावीच्या परीक्षांसदर्भात निर्णय घेतला जाणार होते. मंगळवारी त्यांना रुग्णालयात दाखल केल्याची माहिती एम्सच्या अधिकाऱ्यांनी दिली आहे. एप्रिल महिन्यात निशंक यांना कोरोनाची लागण झाली होती.

Union Education Minister Dr Ramesh Pokhriyal Nishank admitted to AIIMS due to post COVID complications today: AIIMS officials

(File pic) pic.twitter.com/w1xMx8xhmt — ANI (@ANI) June 1, 2021

बारावीच्या परीक्षांबाबत 1 जून रोजी हा निर्णय घेतला जाईल आणि त्याकरता बैठकही होईल असं अपेक्षित होतं. तत्त्पूर्वी पोखरियाल यांना एम्समध्ये दाखल करण्यात आलं आहे. सीबीएसई बोर्डाद्वारे बारावीच्या परीक्षांबाबत जो काही निर्णय घेतला जाईल त्याचा परिणाम विविध राज्यातील बारावीच्या परीक्षांवर देखील होण्याची शक्यता आहे.

हे वाचा-मुलाच्या जीवासाठी वडिलांची धडपड, औषधासाठी सायकलवरून केला 300 किमीचा प्रवास

पोखरियाल यांना एप्रिल महिन्यात कोरोनाची लागण झाली होती. त्यावेळी देखील त्यांना रुग्णालयामध्ये दाखल करण्यात आलं होतं. दरम्यान त्यांच्या प्रकृतीत सुधारणा झाल्यानंतर त्यांना डिस्चार्ज देण्यात आला होता. कोरोनातून बरे झाल्यानंतर त्यांनी शिक्षण मंत्रालयाचं काम देखील सुरू केलं होतं. व्हिडीओ कॉन्फरन्सिंगद्वारे ते बैठकांमध्ये सहभागी होत होते. दरम्यान आता पोस्ट कोव्हिड कॉम्प्लिकेशन्समुळे त्यांना पुन्हा रुग्णालयात भरती करण्यात आलं आहे.